Fiorentina coach an ban

Italian club Fiorentina chuan an coach Giuseppe Iachini an ban a, a hmun ruak luah turin Thawhṭanni zan khan Cesare Prandelli an lakluh thu an puang chhunzawm nghal.

Prandelli hian tun hmain 2005-2010 chhung khan Fiorentina hi a lo enkawl tawh, tun hnaiah ko kir mah se beisei a phak lo. Tun season Serie A match sarih khelh tawh chinah vawi hnih chauh a chakpui thei a ni.

Fiorentina president Rocco Commisso chuan, "Mimal takin Beppe Iachini chungah lawmthu ka sawi, season hmasa khan hun harsa tak kan tawh laiin min rawn khai chhuak. Vanduai thlak takin result ṭha kan nei chhunzawm lo erawh a pawi.

"Hna ṭha tak dang a thawh chhunzawm leh ka duh pui a, Italian football hrechiangtu a nih avangin Italy rama inelna sang berah hian a duh a nih chuan team enkawl tur a hmu zel ang," a ti.

Manager thar Prandelli-a contract rei zawng hi tarlan a ni lo a, tun kar tawp aṭangin a hna a ṭan ang. A kaihhruaina hnuaia an match hmasa ber atan November 22, Pathianni hian Benevento an mikhual dawn a ni.