A tawp thlenga beiseitu Ronaldo a ropui leh ta

Thawhlehni zan khan Cristiano Ronaldo-a'n injury time-ah goal ṭha bik a khung a, Bergamo-ah Manchester United leh Atalanta te 2-2 in an inhnehtawk a, Ole Gunnar Solskjaer leh a hote chhanhimtu chu Portuguese forward bawk a ni.

Champions League inkhel hmuhnawm takah Josip Ilicic leh Duvan Zapata te hmangin Italian club-in ṭum hnih hma hruai mah se Ronaldo hmangin English club-in an sut ve ve. Man United-in point khat hlu tak an hlawh chhuak a, Solskjaer-a hote tan knockout stage lut turin kawng a inhawn zau phah hle.

3-5-2
Norwegian manager Solskjaer-a'n inhliam vangin Victor Lindelof a chhawr thei lo chungin Tottenham an hneh ṭuma a formation hman 3-5-2 a hmang nawn a, Raphael Varane leh Harry Maguire te kianga ding turin Eric Bailly-a'n bul a ṭan.

Liverpool laka hnawhchhuah Paul Pogba chu Champions League-ah hrem a ni lo a, French midfielder hi Fred aia luhtir niin Scott McTominay nen an inkawp. Tlarhmaah Ronaldo kawppui turin Edinson Cavani aiah Marcus Rashford thlan a ni.

Goal, inhliam leh hmuhnawm
United-in nung takin inkhel bul an ṭan a, McTominay ball petin Atalanta defender a per hnuah goal ban a per nghal. Mahse, minute 12-naah mualneituin goal an khung hmasa zawk a, Zapata cross chu Ilicic-a'n vawi khatah pet nghalin goal-ah a chantir a, David de Gea erawhin a tih tur a ti tawk lo.

Atalanta-in Zapata hmangin goal hnih khung theihna remchang an nei a, Ivorian defender Bailly a inrawlh hman avangin Man United an him. Kum 30 mi Colombian striker Zapata hi Man United tlarhnung tan a hnawk hle.

English club tana harsatna belhchhah turin Varane chu malpui hliam vangin minute 38-na lekah lakchhuah a ṭul a, Solskjaer-a'n goal an mamawh tih hriain French defender aiah Mason Greenwood luhtirin defender panga chu paliah a thlak.

Greenwood-a lutin awmzia a nei a, first half injury time-a Ronaldo siphurh sutna goal-ah a inrawlh nghal. Atalanta tlarhnung ṭhiat turin Ronaldo, Greenwood leh Bruno Fernandes ten ball an inpe kual a, Portuguese forward hi a hmawr bawktu niin goal ṭha bik a ni.

Ronaldo bawk
Second half-ah Atalanta bawkin goal an khung hmasa a, José Luis Palomino ball vawrh chu minute 56-naah Zapata-a'n a khung. Assitant referee-in offside tiin phar mah se Zapata a vannei ve ta a, VAR hmanga ennawn a nih hnuah goal-ah pawm a ni.

Man United tlarhnung erawh a phui ṭha tawk lo a, Bailly leh captain Maguire te inkar a zau hret a, Colombian striker offside loh chhanah English defender a mawhpuh theih. Italian club-in a ṭum hnih nan hma hruai mah se Ronaldo telna Man United-in point hmuh beiseina an nei tlat.

Solskjaer-a'n inkhel thlak danglam tumin Nemanja Matic leh Edinson Cavani chu minute 69-naah Pogba leh Marcus Rashford aiah a luhtir a, goal hmuh tur a awm mai lo. Vanneihna beiseiin minute 87-naah Donny van de Beek leh Jadon Sancho te luhtir an ni a, mamawh chhannna erawh Ronaldo tho a ni.

Injury time-ah Ronaldo-a'n goal beiseiin box lai lamah a khalh a, Atalanta player-te tlarhnungah an inhnawh tam avangin an tihpersak, amaherawhchu Greenwood-a'n Ronaldo lam bawkah tiperin Portuguese forward hian mawi zetin goal kilah a volley lut. Box pawn chiaha Ronaldo-a'n a volley goal lai hian keeper tiam loin Atalanta player pariat ngawt box chhungah an awm a, hei hian Ronaldo goal ropuizia a sawifiah.

Tu nge tlang dawn?
Group F inkhel dangah Villarreal-in Etienne Capoue leh Aranut Danjuma te goal hmangin Young Boys 2-0 in an hneh a, Yellow Submarine hian November 23 zanah anmahni ang bawka point sarih hmutu Manchester United an mikhual leh dawn.

Spanish club hian United bakah Atalanta an hmachhawn dawn avangin knockout stage luh a la harsa dawn. Solskjaer-a hote erawh match hnuhnung berah team nem bera ngaih Young Boys an hmachhawn dawn a, an inkhelhna tur Old Trafford a nih bawk avangin last 16 lut turin an dinhmun a ṭhaah a ngaih theih.

Hrilhhaina tehfung awm se, 1-100 anga teh a nih chuan ka hrilhhaina chu 1000 a ni ang. Kan chak theih kan ring a, player-te pawh thawkrim mah se player ṭha bik kan tawng. Ronaldo enkawl harsa tih thawm te ka hria a, mak ka ti. Goal zawnah a pet deuh ziah a, a ball pet chanve chu goal-ah a chantir a, a chanve dang chu save a ngai. Hahdam taka ka awm theih nan min kalsan turin ka hrilh.
- Gian Piero Gasperini, Atalanta manager
(Ronaldo hian Old Trafford leh Atleti Azzurri d'Italia-ah hun tawp dawnah chakna goal leh siphurh sutna goal a khung)

Kan hna chin kan hre vek. Ronaldo hi team hruaitu a ni. Hun pawimawhah a pawimawhna a pholang ṭhin. Chicago Bulls pawh khan Michael Jordan neih kha pawi an ti lo ang. Cristiano pawhin kan team a tih ṭhat belh a ni.
- Ole Gunnar Solskjaer, Manchester United manager

Mi ṭhenkhat chuan Ronaldo hi a thawkrim tawk lo tiin an sawi a, ani chuan football-a a harsa ber goal a khung ṭhin. Hun harsaah khawi ram pawh ni se, khawi stadium pawh ni se mawhphurhna a hlen ṭhin. Hun pawimawhah a nihna a pholang ṭhin.
- Rio Ferdinand, Manchester United defender hlui