Juventus an tlang; Blues mamawh zat point 1

Champions League champion lai Chelsea tan last 16 lut turin point khat chiah a ngai ta. Group H aṭangin hmahruaitu Juventus chu an tlang chiang a, Old Lady hnung zui turin Blues tan khelh hmabak pahnih aṭanga point khat hlawh chhuah a harsa lo ang.

Premier League club Chelsea hian Hakim Ziyech-a goal khat hmangin Malmo 1-0 in an hneh, match li aṭangin point kua an hmu. Inkhel dangah Juve chuan Zenit St Petersburg 4-2 in an hneh ve thung a, match li an khelh tawhah chak vekin a chung berah an awm.

Goal khat a tawk
Chelsea hian striker ṭha Romelu Lukaku leh Timo Werner an la chhawr thei lo a, tlarhma lamah Kai Havertz, Hakimi Ziyech leh Callum Hudson-Odoi te an inkawp a, damlohna vangin Mason Mount a la khel thei lo bawk.

Thomas Tuchel-a'n a duh ang taka a naute a rem theih loh avangin goal khung pawh an harsat deuh, chawlhlawk hmain goal an khung thei lo. Mahse, minute 56-naah Callum Hudson-Odoi siamsak chu Ziyech-a'n goal awmchhun atan a khung.

Hun tawp dawnah Thiago Silva chuan an goal hnihna a khung teuh hle, mahse a ball tauh lut ngei tura ngaih chu defender Anel Ahmedhodzic-a'n goalline a pelh hmain a lo dang hman. An intawn hmasaka goal li chhuahtu Swedish club-in goal khat aia tam an chhuah duh tawh lo.

Tlarhnung phui
Thomas Tuchel-a nauten harsa takin goal an khung a, fak hmaih loh tur chu an tlarhnung phui ṭha a ni. Malmo hian target zawna 'shot' an nei miah lo, keeper Edouard Mendy chuan tun hnai a match hnuhnung pangah clean sheet a nei vek.

Eleda Stadion-ah fans thawm a ṭha takzet a, tawnhriat ngah lo deuh player tan phei chuan zamna tham a ni ngei ang. Boruak sang tawng hnem tawh Silva hoin tlarhnung an ding nghet tlat a, tun hnaia khel tam lo Marcos Alonso pawhin Ben Chilwell aiin a nep bik lo tih a lantir.

German manager Tuchel hian league lama khel ṭha tak Reece James chu bench lamah dahin Cesar Azpilicueta chu wing back atan a hmang leh ta thung a, tlarhma lam an indaih lo deuh a nih pawhin a hnung lamah chuan duhthlan tur a ngah tawk hle.

100% Juve
Serie A lama talbuai deuh mah se Champions League-ah chuan Juventus chu 'Palian' an ni. Paulo Dybala-a'n goal hnih a khung bakah Federico Chiesa leh Alvaro Morata ten goal khat ve ve an khung belh bawk a, nuamsa takin hnehna an chang.

Italian club defender Leonardo Bonucci-a'n anmahni lamah a tih luh palh bakah Zenit forward Sardar Azmoun chuan hun tawp dawnah goal khat a nei ve bawk a, mahse awmzia a nei lo. Dybala leh Chiesa ten goal dang an khung belh lo kha Russian club an vannei zawk.

UCL match lia chak ve thei Old Lady inkhel a hmuhnawm, manager Massimiliano Allegri naute hi league lama an khelh dan nen a inthlau hle. Ball an chang tamin an goal nawr a na, an vanneih ṭum ni se goal li aia tam an khung thei ang - Morata goal khung pawm loh an nei bawk a ni.

Platini khumtu
Zenit laka goal hnih khungtu Dybala khan Juventus tan inelna hrang hrangah match 264 a khelh aṭangin goal 106 a khung ta a, Turin club tana goal khung hnem lamah club legend Michel Platini (104 goals) a khum ta chiah.

Argentine forward Dybala hian record a siam zanah Platini a theihnghilh lo. Attacking midfielder Platini-a'n a goal khung a lawm dan angin khelmualah a mu a, leiah a kiu nghatin a lu a nem kang - mipui lawm a hlawh hle.

Dybala chuan, "Platini tana ti ka ni. Ka player ngaihsan leh mi tam takin an ngaihsan a ni a, a bik takin Juventus tan a hlu," tiin a goal lawm dan chungchang a sawi a, last 16 an thleng chu a bul ṭanna chauh a nih thu a sawi bawk.

Kan duh ang result a ni, kan duh leh beisei ang tak result kan nei hi a lawmawm. Hun chanve hma lamah khan kan che rang tawk lo, second half-ah erawh kan ball inpe a rangin inkhel pawh kan thunun, goal tam zawk khung thei tur kan ni," - Thomas Tuchel, Chelsea coach