Hnehna nen Djokovic a lo kir

Novak Djokovic chuan US Open hnua a vawi khat nan singles match a khelh leh ta. Serbian star hi Paris Masters-ah inlanin a match hmasa berah Marton Fucsovics chu harsa takin a hneh hram.

World number 1 Djokovic hian Hungarian player Fucsovics hi 6-2, 4-6, 6-3 in a hneh. September thla khan New York khawpuiah Novak hian Daniil Medvedev a hneh lo, tun hnaiah match a khelh tam loh avangin a tan thil a awlsam vek bik lo.

Seeded pakhatna Djokovic chuan, "Chak tumin ka bei a, a awlsam dawn lo tih kha chu ka hre lawk. Ka khelh ṭhat ber ṭum ni lo mah se hnehna ka chang thei hi ka lawm hle," tiin a sawi a, hnehna a chan vanga a lawm thu a sawi.

Grand Slam vawi 20 champion tawh Djokovic hian mipa player zinga a hmasa ber ni turin, season khat chhunga major title lak kim vek bakah Olympic gold medal lak a tum a, mahse a hlawhtling thei ta lo.

Season kal laiah Australian Open, French Open leh Wimbledon te a lak avang erawh chuan atan kum ṭha bik chu a ni ta tho. A vawi riat nan number 1 ni chungin kum tawp hman a tum a, a ti thei a nih chuan player dangin an la tih ve theih ngai loh a ni ang.

Last 16-ah chuan Djokovic Adrian Mannarino leh Gael Monfils te inkhela chak zawk a hmachhawn leh dawn. Paris khawpuia inelna neih laiah hian player ṭha an inlan hnem avangin champion a awlsam dawn lo.

Paris Masters-ah hian Djokovic hi a champion leh a nih chuan Masters 1000 title lak hnem lamah record thar a siam thei dawn bawk. Grand Slam dawt chiahah inelna ngaihhlut Masters-ah hian Novak leh Rafael Nadal te chu vawi 36 ve ve an champion tawh.