David Moyes tan mellung phun hun

West Ham United chuan zanin dar 11:45 hian Europa League khel turin Genk an lenchilh dawn, manager David Moyes-a'n match 1000 zetah a naute a enkawl tling dawn ta a, atan ni chhinchhiah tlak bik a ni ang.

Scottish manager Moyes hi kum 58 mi chauh a la ni, a kum la tam viau lo mah se team enkawl lamah erawh tawnhriat a ngah tawh hle. Hammers hi ṭum hnih a enkawlna a ni - Preston North End, Everton, Manchester United, Real Sociedad leh Sunderland te a lo enkawl tawh bawk.

Season kal laiah West Ham hi an khel ṭha tluang rih hle. Europa League-ah match thum khel tawhin an la chak vek - Premier League lamah pawh a sang zual pali zingah an tel phak hial, inrintawkna an neih san vanglai tak a ni.

October thla chawhnu lam khan Genk nen pawh hian an lo inhmachhawn tawh. London Stadium-a inkhelah mualneitu hi 3-0 in an chak, zaninah an khelhna tur erawh Cristal Arena a nih tawh avangin a hma ai chuan a awlsam dawn lo.

Moyes tana chanchin lawmawm chu a player zingah hliam leh harsatna nei an awm lo hi a ni. Group stage match hnuhnung lama hahchawl thei turin tuna chet ṭhat a pawimawh a, Belgian club laka point thum an hlawhchhuak thei a nih chuan kawng a awlsam tawh khawp ang.

West Ham midfielder Manuel Lanzini chuan, "Team ṭha tak kan indin thei hi a lawmawm, player senior bakah naupang zawkte kan inchawh pawlh rual ṭha em em a, inrintawkna kan neih bawk avangin beiseina pawh kan nei," a ti a, an coach Moyes tana hun pawimawhah chak ngei an tum ang.