Pakistan-in semifinal an lut

Thawhlehni zan khan Pakistan-in Namibia 45 runs-in an hneh a, T20 World Cup semifinal an lut. Shaheens hian India, New Zealand, Afghanistan leh Namibia te an hmachhawn tawh a, an hneh vek avangin match li lek aṭangin semifinal an lut.

Group 2 aṭanga Pakistan hnung zui turin New Zealand dinhmun a ṭha a, India pawhin beiseina tlem la nei mah se Black Caps chetsual an ngaihchan a ngai tawh thung.

Rizwan leh Azam
Sheikh Zayed Stadium-ah Pakistan-in bat hmasak an thlang a, India an hmachhawn ṭum ang thoin opener Mohammad Rizwan (79*) leh Babar Azam (70) te an che ṭha hle. Rizwan leh Azam te inkawp ringawt hian over 14.1-ah 113 runs an siam hman a, ram tenau Namibia an hmachhawn avangin wicket khat an hloh hian chak turin an dinhmun a ṭha tawh.

Mohammad Hafeez-a'n thi loin 32 runs a rawn siam ve bawk a, Pakistan hian over 20-ah 189/2 runs an siam. Namibia tan target a sang mah mah a, opener Stephan Baard (29) leh David Wiese (43*) te chet ṭhat zarah 144/5 runs an siam a, mualpho loin an tlawm.

Proteas an chak
Group 1-ah England-in semifinal an hnaih a, hmunruak dang pakhat hi South Africa leh Australia ten an inchuh dawn niin a lang. Proteas hian Sheikh Zayed Stadium-ah Bangladesh chu wicket rukinan sawp. Tigers hian bat hmasain over 18.2-ah 84 runs chauh siamin an thi fai vek a, South Africa hian over 13.3 lekah 86/4 runs siamin target hi a umpha.

South Africa hian match hnuhnung berah November 6, Inrinni zan hian England an hmachhawn dawn a, knockout stage thlen an tum a nih chuan chak ngei a ṭul dawn. Australia-in vawiin tlai dar 3:30 hian Bangladesh an hmachhawn dawn a, November 6-ah West Indies nen an inkhel leh dawn. Aussies hi match hnih an khelh hmabak an chak ngei a rinawm a, group 1 aṭanga semifinal lut tur hriatthiam a la har hle.