Barca an chak; beisei a la bo lo

Manager nei lo Barcelona-in Champions League last 16 lut turin beiseina thar an insiam a, khualmualah Dynamo Kiev chu 1-0 in an hneh.

Catalan club tan Ansu Fati chuan inkhela goal awmchhun hi a khung a, Ukrainian club-in a chhanletna tur an neih loh avangin Barca-in point thum hlu tak an hlawh chhuak.

Barca-in match li an khelh aṭangin point ruk an nei ta a, Bayern Munich-in 5-2 a Benfica an hneh avangin table-ah pahnihna dinhmun an luah zui.

La Liga lamah pawh beisei phak lo Barca hian Benfica mikhualin Bayern an la lenchilh leh dawn a, round of 16 luh leh luh loh chu an kutah a innghat.

A hmingah Fati
Team pahnihin goal an khung hmain mualneitu tan Mykola Shaparenko chuan chance duhawm vawi hnih a nei a, mahse, kum 23 mi midfielder hian uiawm takin a khung lo ve ve.

Barcelona tan Fati chuan penalty a hlawh chhuak hmanah a inngai a, mahse, Kiev defender Tomasz Kedziora-a'n a titlu anga lang hi video assistant referee (VAR) hmanga ennawn a nih hnuah Fati zawkin a peta a lan avangin sut a ni.

Messi kalsan number 10 hatu Fati hi dan reng theih erawh a ni lo. Minute 70-naa Oscar Mingueza cross aṭanga ball dan per chu a ke bulah tak a tla a, harsatna nei loin goal-ah a chantir - tun season match sarih a khelh aṭanga goal thum a khungna a ni a, assist vawi khat a nei bawk.

Kiev tan Victor Tsygankov chuan si phurh sutna remchang nei mah se Barca goalkeeper Marc-Andre Ter Stegen chuan ṭha zetin a dansak a, a tawpah Barca an chak.

Barca hmabak
Barcelona-in coach lailawk Sergi Barjuán hnuaiah an khel mek a, Spanish midfielder Xavi chuan Catalan club enkawl hna hi a thawk thuai dawn nia sawi a ni - Xavi hoa Champions League last 16 lut turin beiseina an nei.

Season hnuhnung 17-a vawi 16 ngawt Champions League last 16 lut thei Barca hian November 23 zanah Benfica an mikhual dawn a, khualmuala 3-0 a an hneh loh team hi an hneh chuan last 16 an lut ang.

Benfica laka an tlawm a nih erawh chuan December 8 zanah Bayern an hneh a, Benfica-in Kiev laka point an hloh a ngai bawk ang - a tawi zawnga sawi chuan Barca tan kawng zau taka hawnin a la awm.

Barca hian Inrinni zanah league match khel turin Celta Vigo an lenchilh zui dawn a, he thu buatsaih lai hian coach atana Xavi an lakluh hman dawn leh dawn loh a la hriat loh.