Magpies enkawl tum lo Emery

Sum ngah thar Newcastle United chuan Villarreal coach Unai Emery lakluh beisei mah se Spanish manager hian Magpies hi a hnar dawn nia sawi a ni a, he thu buatsaih lai hian thuchiang tak a la awm lo.

Arsenal boss hian Magpies-in an dawr ngei thu hi a lo sawi chiang tawh a, mahse, English club lam hian ruahmanna felfai tak Emery dawhkanah an chhawp theih loh avangin Spanish coach hian pan chiah a ngai lo niin an sawi.

Spanish football expert Guillem Balague chuan, "Tun season-ah chuan Emery hi an thlem lut theiin ka ring lo. Nakkumah, club hmachhawp leh tumte chiang taka an sawi theih hunah an inhmin thei mahna," a ti.

Balague-a sawi dan chuan Emery hnena thurawn petu, a thawhpuite chu Magpies ruahmannaah an hmin chiah lo - tun dinhmunah Newcastle hi Emery bakah Bournemouth manager hlui Eddie Howe nen sawizawm an ni.

Hei tak hi Emery-a team lam hian mak an ti - coach pahnih hi kalphung inang lo tak an ni a, European football-a an tawnhriat a inthlau viau bawk. Hei hian Magpies hmachhawp a tichiang lo zualah an ngai.

Emery hian Sevilla chu season thum chhung a zawnin Europa League-ah a champion pui tawh a, season hmasa khan final-a Manchester United hnehin Villarreal chu Europa nomawi a chawipui bawk.

Paris Saint-Germain a enkawl laiin Ligue 1, Coupe de France (2), Coupe de la Ligue (2) leh Trophée des Champions (2) nomawi a chawi a, kum 43 mi Howe hi coach hmabak nei êng tak ni mah se Emery te nen huang khata dah a la rem lo.

Kum 50 mi Emery hian Magpies enkawl hi a hreh lo a, mahse, thil thlen dan thlirin English club pan hi a 'risk' a sang a ti ni berin a lang.

Emery hi Villarreal neitu Roig chhungkua nen an inhmu a, anni lam hian an coach hi chhuak lo hram turin an lo thlem bawk. Hei mai a ni lo - Villarreal player-te chuan Emery hi chhuak lo turin an thlem a, a chhungte lamin St James' Park lama insawn hunah an ngai lo bawk.

Steve Bruce bantu Magpies hian an duh ang ngawtin coach an lalut thei dawn bik lo tih a chiang tawh. Tottenham Hotspur manager thar Antonio Conte, Barcelona legend Xavi leh Germany manager hlui Joachim Low te pawh an bia a, an hnar vek - Roma manager hlui Paulo Fonseca pawh an dawr.