Napoli leh Roma an zualko

Italian club Napoli leh AS Roma te chu Serie A khelh laiah 3-0 a chak loh tir ve ve an ni tawh a, thuneitu sang Italian Football Federation (FIGC) hnenah an dikna chanvo hmu let turin an zualko.

October 4 khan Napoli chu Juventus nena inkhel tur an ni, mahse an club awmna Naples khawpui thuneitu lamin coronavirus inkaihhruaina vangin zinchhuah an phal lo - Turin an pan thei lo tihna a ni.

Napoli khingpui tur Old Lady erawh an khelmual Allianz Stadium-ah inkhel turin an inlan thung a, Italian champion Juve hi an khingpui an inlan loh avangin 3-0 a chakah an puang a, inlan lo team hi an point hmuhsa aṭangin point khat an paihsak bawk.

Roma pawhin buaina an nei, September 19 khan Serie A season khuhhawnna inkhelah Hellas Verona an hmachhawn a, squad a ziah tel loh Amadou Diawara chu an khelhtir. Midfielder Diawara hian July khan kum 23 a lo pum tawh si a, under 22 player a ni tawh lo.

Under 22 player-te hi squad a ziahluh kher ngai loa chhawr theih an ni, mahse kum an tlin tawh chinah chuan inkhel turin player 25 awmna squad-ah ziah luh an ngai thung. Roma chuan hrileng vanga harsatna an tawh bakah player kum zat hi tihsual palh a nih thu an sawi.