LewanGOALski a che leh ta

Robert Lewandowski chuan Champions League match 100 a khelh tlinna chu hattrick hmangin a lawm a, Bayern Munich-in 5-2 ngawta Benfica an sawpna inkhelah goal thum a khung.

German champion tan Lewy bakah Serge Gnabry leh Leroy Sane te chuan goal khat ve ve an khung a, Benfica tana Morato leh Darwin Nunez goal khung chu mualpho zualpui khuhna chauh a ni.

Bayern-in an mikhual Benfica an hneh avangin Champions League match li an khelh aṭangin point 12 an nei ta a, last 16 an lut chiang tawh.

Bundesliga lamah pawh Bayern hian match 10 aṭanga point 25 neiin hma an hruai mek a, Inrinni zanah SC Freiburg mikhualin league match an khelh chhunzawm ang.

Goal a sur e
Allianz Arena-ah goal khung turin nghah rei a ngai lo. Lewandowski chuan minute 26-na lekah goal a rawn khung ṭan a, Lewy hian minute ruk hnuah Gnabry khung tur a siamsak zui bawk.

Benfica-in mualpho an tum bik lo tih pholangin Morata hmangin si phurh an rawn sut ṭhen a, goal dang lut loin chawlhlawk hman a ni - first half hun pek belhah Lewy chuan penalty hmangin goal khung belhna remchang nei mah se a la lap hret a, a chhuih lut lo.

Mahse, second half hamrik a rik rualin Lewy a insiamṭha nghal. Minute 49-naa Sane-a'n an goal thumna a khung hnuah mawi zetin a goal hnihna a khung a, a hattrick siam nana Manuel Neuer-a long ball um luta a pet goal-te chu striker class a nihzia pholangtu a ni.

Second half-a Lewy goal hnih khung karah Nunez chuan Benfica tan a khung ve bawk a, mahse, hetihlai hian goal li an chhuah fel der tawh a, a team a fuih phur zo lo.

Lewy & 100
Kum 33 mi ni tawh chungin Lewandowski-a'n goal khung hna a thawk chhunzawm zel a, Bayern tan tun season-a match 16 a khelh aṭangin goal 22 a khung tling der tawh!

Champions League-a match 100-a khelh tlinnaah hattrick a siam a, European club football inelnaah hian goal 81 a khung tling der tawh. Champions League-a goal khung hnem lamah Cristiano Ronaldo (139 goals) leh Lionel Messi (123) chiah a tluk lo.

Lewy hian a'n Champions League goal 81 khung tur hian hattrick vawi li a siam a, tun season bikah match li aṭangin goal riat a khung - top scorer a ni mek.

Bayern hian tun season Champions League-a match li an khelhah hnehna an la chang vek a, goal 17 an khung tawh bawk - last 16-ah pawh tum an châkawm lo ang!