Liverpool-in 'group of death' an hre lo

Champions League draw neih a nih khan Liverpool, Atletico Madrid, AC Milan leh FC Porto te group khatah an awm ho a, media ṭhahnem takin 'group of death' hming an puttir.

Mahse, Liverpool-in group of death an hre lo a, match li an khelhah chak vekin Champions League last 16 an lut - i chhiar dik e, match hnih khelh tur la nei chungin Reds chu a thiam 16 zingah an tel dawn tih a chiang tawh.

Liverpool hian Nilaini zan khan an mikhual Atletico Madrid chu 2-0 in an hneh a, minute 36-naah Atletico defender Felipe hnawhchhuah a nih bawk avangin nuamsa takin an chak.

Reds tan Diogo Jota leh Sadio Mane ten goal khat ve ve an khung a, goal pahnih hi Trent Alexander-Arnold siamsak ve ve a ni.

Goal khung thiam
Atletico-in Liverpool an tlawh zanah Anfield-a ropui taka lo khel tawh ṭhin Luis Suarez chu Atletico Madrid tan a rawn inlan a, fans tam takin an theihnghilh theih loh Fernando Torres chu inkhel entu zingah a awm bawk.

Liverpool striker ropui ṭhin pahnih hi Atletico fachuam an ni tawh a, Reds-in an mikhual lakah ṭhat chhuah an tum lo - minute 10 chhung chu Atletico tlarhnung ṭhiat lo mah se a hnu lam erawh Atletico lamah inkhel kan en a ni ber!

Minute 13-na lekah Arnold chuan Jota tan ṭha zetin ball a thlawh lut a, Portuguese forward hian harsatna nei loin hnai set sawt aṭangin a tauh lut - Atletico keeper ṭha mi Jan Oblak a che hman lo.

Atletico an insiamṭha hman lo. Minute 21-naah Arnold bawk kan hmu nawn a, Atletico goal lama shot-cross chu Mane chuan lo nang fuhin goal-ah a chantir - minute 30 em pawh a tlin hmain Reds-in goal hnih an khung der!

Red card & buaina
Atletico an che hleithei meuh lo a, hma taka goal hnih an chhuah nghal ngawt avangin beiseina an nei tlem - minute 36-naah an dinhmun chhe tawh sa tihchhiat belh turin Felipe chu hnawhchhuah a ni.

Madrid khaw club defender hian ṭul lo takin Mane-a ball tlanpui tur chu a pet lui a, Dutch referee Danny Makkelie chuan he thil thleng hi an bul lawk aṭanga a lo hmuh bawk si avangin red card a phawrh.

Felipe-a red card hmuhna hi in hnawhchhuah loh theihna tak chu a ni - mahse, referee-in card a pek dawna a lama a huiin Felipe hian a hre duh lo a, hei ringawt pawh hi hremna tham a tling.

Atletico ropui loh zanah Suarez chuan goal-a khungah inngai mah se video assistant referee (VAR) hmanga ennawn a nih hnuah offside vangin pawmsak a ni lo a, a ball khawih apianga Kop hoin an auh el player hian danglamna a thlen thei bik lo.

Liverpool an ropui
Jurgen Klopp-a hnuaiah Liverpool an ropui chhunzawm zel a, tun season inelna hrang hranga match 16 an khelh tawhah an la tlawm lo - he team hi an la hmuhnawm dawn chauh niin a lang.

April 6-a Champions League quar-terfinal-a Real Madrid an ngam loh hnuah khan Reds an tlawm leh tawh lo a, inelna hrang hranga an match hnuhnung 25-ah an tlawm miah lo tihna a ni!

Reds hian Champions League-ah Porto mikhualin AC Milan an la lenchilh leh dawn a, mahse, last 16 an luh chian tawh avangin heng inkhel hian Klopp-a ngaihtuahna a tibuai lutuk tawh loin a rinawm.

Liverpool tan Alexander-Arnold chu player hmuhnawm bik a ni a, khawvela right back ṭha bera ngaitute tan ṭan chhan tur a siam zel. Player tam zawk an nih hnuah Liverpool-in chance an ngah lehzual a, mahse, an vanneih zan a ni lo - Jota goal hnihna pawh VAR hmanga ennawn a nih hnuah offside vanga pawm a ni lo.

Squad a chhah
Season hmasaa hliam vanga talbuai tak Reds hian an ṭhat dan berin season an hmang leh ta, tiin a sawi ngam a, match tina Klopp-a player siksawi dan thlir pawhin an squad-ah rintlak player an tamzia a lang.

Atletico lakah pawh Roberto Firmino chu bench-ah dah niin a aiah Jota a lut a, a hna tlinzia inhrilh nawn a ngai lo. Firmino hi bench aṭanga luhtir ni mah se hliam vanga lakchhuah a ngai leh a, hliam na tak erawh ni lo tura ngaih a ni.

Naby Keita chu hliam vangin chhawr theih loh mah se a aia lut Alex Oxlade-Chamberlain-a'n a dam ṭhat phawt chuan rintlak a nihzia a pholang bawk. Reds hian bench-ah Thiago Alcántara an la dah thei cheu!

Klopp-a'n Atletico 'meuh' an mikhual ṭum pawhin player a siksawi ngam a, Andy Robertson pawhin bench lamah hun a hmang - a aia lut Konstantinos Tsimikas pawh a rintlak tih kan hmu nawn e.

Mipuiin goal tam zawk khung turin min duh tih ka hria a, chance pawh kan insiam hnem hle. Kan goal khung pakhat chu pawm loh a ni a, engtinnge kan hlah theih zawk, tih mai turin chance ṭhenkhat chu kan khawhral bawk. Ka ngaihdanah chuan kan inkhel kha kan duh ang ngeiin a ṭha famkim teuh takzet a, a hunah tak goal kan khung a ni. Kan intum hmasak aiin Atletico khan min nawr an tum zawk - mahse, tlarhnung kan veng ṭha a, Trent-a assist pahnih kha a ṭha em em bawk. Atletico-in red card an hmu a, player 10 leka khel hmachhawn hi kan duh dan a ni lo. Mahse, chutiangah chuan fimkhur a ṭul ṭhin. A tawpah erawh 2-0 in kan chak a, zan hlimawm tak a ni. - Jurgen Klopp, Liverpool manager

Red card kha chu referee kohnaa a kal duh loh vangah ka ngai a, mahse, a hnuah referee-in Felipe a hnawhchhuah chhan chu Mane laka a foul vang tih min hrilh. Goal kan chhuah avang khan kan tlarhnung a nghing ta viau tihna a ni bik lo a, kan khingpui quality sawi tel a ngai - Arnold-a ball cross dan kha dan a harsa em a ni. Team pahnihin bul kan ṭan ṭha ve ve a, mahse, goal leh red card kan chawi hnuah kha chuan kan tan a harsa tawh. Second half kan khelh dan kan en chuan kan nawr hian kan tlarhnung ven pawh kan thiam zawk tih kan hmu ang. - Diego Simeone, Atletico Madrid manager