India coach thar tur Rahul Dravid

BCCI chuan India cricket team enkawl turin captain hlui Rahul Dravid an ruat a, kum 48 mi batting legend hian Ravi Shastri a thlak ang.

Dravid hian inelna pathum T20, ODI leh Tests-ah India team hi a kaihruai vek dawn a, November leh December thlaa New Zealand an tlawh aṭangin Men in Blue hi a enkawl ṭan dawn a ni.

T20 World Cup-a India coach Shastri hian kum 2017 aṭang khan India team hi a enkawl ṭan a, inelna zawh rualin a contract neih lai hi a tawp dawn.

Dravid chuan, "Head coach atana min ruat hi chawimawinaah ka ngai. Kum hnih chhungin inelna lian hmachhawn tur a awm nual dawn a, chumi hunah chuan kan theihna anga khelh chhuah kan tum ang," tiin a sawi.

Nakkum October leh November chhungin Australia-ah T20 World Cup khelh a ni leh dawn a, kum 2023-ah India-in ODI Cricket World Cup an thleng dawn.

India-in 2011 World Cup an champion ṭum khan Dravid hi telh a ni lo a, hemi hnu lawk hian ram tana ODI khelh a chawlhsan. Kum 2012-ah Test leh domestic cricket aṭangin a chawl leh bawk.

Dravid hian National Cricket Academy-ah director of cricket operations hna a chelh mek a, kum 2016 leh 2019 chhung khan India Under 19 leh India A team enkawlin 2018 Under 19 World Cup-ah a champion pui a ni.