Vawiin aṭangin Hero Futsal Club C'ship
All India Football Federation (AIFF) hriatpuia India ram pup huap futsal inelna hmasa ber Hero Futsal Club Championship chu vawiin aṭangin Delhi-ah khelh ṭan a ni dawn. Inelnaah hian Mizoram aiawhin Chanmari Zothan Futsal an tel a, vawiin tlai dar 2:30 hian Super Strikers Futsal Club an hmachhawn ang.
Eurosport chuan AIFF hriatpui futsal inelna hi a pe chhuak dawn a, Chanmari Zothan Futsal inkhel a en theih dawn. Mizo futsal referee Frank Rinpuia chu inelna kaihruai tur zinga thlan a nih angin AIFF hnuaia futsal inelna lian tham hmasa ber referee zingah a tel.
Chanmari Zothan secretary David Zohmingthanga chuan, "Inelna kan hmachhawn theih nana min puitu Sunflower Electronic, Chanmari; LB Associate, Bungkawn leh MSSC te chungah kan lawm. Chief Minister zahawm tak zarah RT PCR vawi hnih kan test bakah Mizoram House, Vasant Vihar-ah kan thlen theih phah bawk. Club hming chawitu Zothan chhungkua te leh Chanmari venga mi inphalte chungah kan lawm tak meuh meuh a ni," tiin Vanglaini a hrilh.
Inelnaah hian team 16 an tel a, group paliah ṭhendarh niin group khat aṭangin a sang ber zelin semifinal an lut dawn. November 12, Zirtawpniah semifinal khelh a ni ang a, final hi November 14, Pathianniah khelh a ni thung ang.
Thlirna Tawi
Group A Chanmari Zothan Futsal, Super Strikers Futsal Club, Baroda Football Club, Mohammedan Sporting Club.
Group B Kuppuraj Football Club, Speed Force Football Club, Sporting Clube de Goa, Bengaluru Football Club.
Group C Telongjem Football Club, Delhi Football Club, Niaw Wasa United Sports & Cultural Club, Tiddim Road Athletic Union Football Club.
Group D Real Kashmir Football Club, Classic Football Academy, Mangala Club, Sudeva Delhi Football Club.
Vawiin Inkhel Tur
Baroda 12:00 PM Mohammedan
Chanmari Zothan 2:30 PM Super Strikers
Kuppuraj 5:00 PM Speed Force
Sporting Clube de Goa 7:30 PM Bengaluru
Chanmari match dang
November 7, Pathianni
Chanmari Zothan 12:00 PM Baroda Football Club
November 9, Thawhlehni
Mohammedan 12:00 PM Chanmari Zothan