Real chakna Karim Benzema

Karim Benzema a chul thei lo - Real Madrid striker hian Shakhtar Donetsk lakah a team chu 2-1 in hnehna a chanpui a, goal hnih hi a khung ve ve a ni.

Shakhtar phur viau mah se Real-in minute 14-na lekah Benzema hmangin goal hmahruai an khung a, he goal hi Real-in European football club inelna sang bera goal 1,000 an khungna chiah a ni - a hlu bik hle.

Mahse, Ukrainian club-in Santiago Bernabeu-ah chak an tum ngam a, Brazilian striker Fernando chuan minute 39-naah an phu ang ngeiin si phurh a rawn sut - Alan Patrick-a'n ṭha taka a siamsak a ni a, Alan hian goal an khung hma hian uiawm takin post a tih per.

Team pahnihin danglamna an nei - Shakhtar neih ve loh Real-in an nei a, a hming chu Benzema a ni. Kum 33 mi striker hian minute 61-naah a goal hnihna a khung leh a, a team a chakpui.

Benzema hian tun season-a match 14 a khelh aṭangin goal 13 a khung tling ta a, assist vawi riat a nei bawk - a goal khung pahnih hi Vinícius Júnior siamsak a ni.

Real boss Carlo Ancelotti hnuaia Vinícius hmasawnna sawi nawn a ngai leh ṭhin a, tun season-ah match 15 aṭanga goal kua khungin assist vawi sarih a nei ta - an goal hnihna luhna tura Casemiro nena an ball inpe vel chu a nalh hle.

Group D inkhel dangah Inter Milan chuan khualmualah Sheriff Tiraspol chu 3-1 in an hneh a, last 16 luh beiseina an nei thar ve leh ta bawk.

Inter tan Marcelo Brozovic, Milan Skriniar leh Alexis Sanchez ten goal khat ṭheuh an khung a, hun pek belha Adama Traore goal khungin Sheriff a khai chhuak zo lo.

Kum 32 mi Alexis Sanchez-a'n kum 2017 hnua a vawi khat nan Champions League-ah goal a khung a, February 2017-a Bayern Munich laka 5-1 a Arsenal an tlawm ṭuma Gunners tana goal a khung hnuah a chhunzawm ve leh chauh a ni.

Inter-in match li aṭanga point sarih neiin group D-ah pahnihna an ni a, Real-in point kua neiin hma an hruai mek thung. Sheriff beisei a la bo lo a, Shakhtar tan erawh thilmak a ngaih tel tawh dawn avangin last 16 mitthla loh a fuh zawk ang.