Alvarez a inringtawk
Saúl "Canelo" Álvarez chuan November 6-a a hmachhawn tur Caleb Plant chu a hneh ngei tur thu a sawi a, Mexican boxer chuan, "Round sarih emaw round kua bak kan inhnek ka ring lo," a ti!
Alvarez chuan, "Plant hi fighter ṭha tak, thiamna nei sang tak a ni a, mahse, ka tan chu chu thil thar a ni lo. Fighter ṭha tam tak ka lo hmachhawn tawh a, Plant hian ka tan danglamna a siam lo," tiin a sawi.
Boxer pahnih hi November 6 zanah an inhmachhawn dawn a, MGM Grand Garden Arena, Paradise, Nevada-a inhnek tur hi keini lam sanaah chuan Pathianni zing lam a ni ang.
Title inchuh
Kum 31 mi Alvarez hian super middleweight-a kawnghren lian pathum WBA (Super), WBC leh WBO title a kawl mek a, a hmachhawn tur Plant hian IBF title a kawl thung - a chak zawkin super middleweight title langsar chu an kawl kim dawn tihna a ni.
Alvarez chuan, "Ka tan chuan he inhnek tur hi a pawimawh takzet a, ka sulhnu an thlirlet tur leh ka chanchin an sawi zelna tur atan a pawimawh takzet - thawnthu thar chu ziahin a awm dawn a ni," a ti a, title pali neih a tum hle.
Plant a zam bik lo. IBF champion chuan, "He hmuna ka awm thei hi ka hlim a, mahse, he hmun awm theih avang ringawta hlim ka ni lo. He hmunah hian hnehna chang a, super middleweight-a kawnghren pali kawl hmasa ber nih ka tum a ni," a ti.
A 'hot' dawn
Boxer pahnih hi September thla khan a vawi khat nan press conference-ah an intawng a, Alvarez-a'n Plant-a hmai a kuta a khawih avangin buaina a chhuak teuh hle.
Alvarez chuan Plant hian ṭawngkam mawi lo taka a ṭawngkhum avanga hetianga che hi a nih thu a sawi a, Pathianni zinga an intawn hunah boruak a 'hot' loh ring suh!
Mexican boxer Alvarez hian vawi 59 inhnek a hmachhawnah vawi 56 hnehna a chang a, vawi 38 a khingpui a knockout - vawi khat a tlawm a, vawi hnih chu draw result-ah puansak a ni.
Tu nge Plant?
Boxing ngainatu tan Alvarez chanchin inzawh nawn a ngai lo mai thei. Hetihrual hian a khingpui tur Plant erawh a sulhnu ropui ngaihtuahin ngaihven leh hriat a la hlawh tawk lo.
American boxer hian vawi 21 fight a hmachhawn tawhah hnehna a la chang vek a, heng zinga a chak vawi 12-ah hian a khingpui a knockout thei - a namai lo hle.
January 2019 khan José Uzcátegui hnehin IBF super middleweight title a hlawh chhuak a, hemi hnuah hian vawi thum a title a humhim tawh - Alvarez-a 'level' boxer hmachhawn a la nei lo a, Pathianniah a chak chuan khawvelin a chanchin a inzawt nawn tawh lo ang.