Blatter leh Platini ten thubuai nei leh ta!

FIFA president hlui Sepp Blatter leh UEFA boss hlui Michel Platini-te chu Switzerland thuneitute chuan dik lo taka sum tichingpenah puhin thubuai an siamsak a, court hmaa inlan an hmabak mek.

Swiss rama dan lam thuneitute chuan Blattter hian Platini hnenah kum 2011 khan Swiss francs maktaduai hnih (Rs. 16,29,46,235) a thawn a ni, an ti.

Dan lam kengkawhtute chuan he thil thleng hian FIFA thil neih a tibawrhbang a, dik lo takin Platini chuan a hlawkna a lo tel a ni, an ti bawk.

Blatter leh Platini thubuai hi Switzerland khawpui pakhat Bellinzona-a court-ah ngaihtuah zui tur a ni dawn a, thiam loh chantir an nih chuan rei tak lung in tan bakah sum tam tak chawitir theih an ni ang.

Football khawvela thuneitu langsar ni ṭhin Blatter leh Platini hian eiruk thubuai tam tak an nei sa a, tuna an buainaah hian September 2015 khan chhui an lo ni tawh.

FIFA ethics committee pawhin an pahnih hian chhuiin thubuai a lo siamsak tawh a, hun rei tak football-a inhnamhnawih thei tawh lo tura hrem an ni bawk.

Hei vang hian kum 17 zet Blatter-a FIFA President lo ni tawhna chu a tawp a, Platini-a FIFA President nih tumna pawh a tawp zui - a kum lehah hetihlaia UEFA president Platini hian hrem a nihna a khinnaah thiam a chang lo a, European football thuneitu a nihna aṭangin chawlhtir a ni.

Kum 85 mi Blatter leh kum 66 mi Platini te hian tun thlengin tihsual an neih loh thu sawiin puh an nihnaah an la ṭang fan thung.