Tsitsipas inkhel tluan thei lo

Paris Masters khelh laiah champion tura rinkai Stefanos Tsitsipas chu beisei aia hmain a zinkawng a tawp. Nilaini zan second round inkhelah Greek tlangval hi hliam vangin a inhnuhdawh a ngai a ni.

Seeded pathumna Tsitsipas hi Alexei Popyrin nen set khatna an khelh laiin 4-2 in a hniam zawk, hetih lai hian a ban na vangin a inkhel zui thei ta lo, tennis a inkhelh hun chhungin match khelh laklawh laia a inhnuhdawh vawi khatna a ni hial.

Kum 23 mi Tsitsipas chuan, "Vanneih thlak takin inelna hmachhawn laiin ka hliam ngai meuh lo, mahse tun ṭumah chuan a vawi khat nan ka inhnuhdawh a ngai ta si. Tunah chuan tournament awm leh tur nghah a ngai ta," a ti.

Tsitsipas hian season kal laiah singles match 73 a khel tling tawh a, vawi 55 hnehna a chang. French Open final a thlen hnuah erawh a zuih ta hret a, US Open-ah third round a thleng a, kar hmasa a neih Vienna Open-ah erawh second round a paltlang lo.

Inkhel dangah champion lai Daniil Medvedev chuan Ilya Ivashka 7-5, 6-4 in a hneh a, season tawpa number 1 nih a beiseina a la chhawm nung ve zel.

Russian tlangval Med-vedev hi tun din-hmunah world number 2 a ni mek, number 1 nih beiseina la nei mah se mimal chet ṭhat ringawt a tawk lo, a chunga awm Novak Djokovic a chet sual tel a ngai dawn a ni.

Mipa singles inkhel dangah Alexander Zverev chuan Dusan Lajovic 6-3, 7-6 (5) in a hneh. Olympic champion hi set khatna laihawlah a nghawng na vanga enkawl a ngai a, mahse na tak a nih loh avangin a inkhel tluan thei.