Man City an chak chiang, PSG an chelh

UEFA Champions League-ah champion rinkai zinga mi Manchester City chuan Nilaini zan khan Club Brugge 4-1 in an sawp a, group A inkhel dangah RB Leipzig-in hming langsar tamna PSG 2-2 in an chelh.

Man City leh PSG hian pakhatna leh pahnihna dinhmun luah mah se team ṭha pahnih hi November 24, Nilaini zanah an inkhel dawn. Inkhel result a zirin Mauricio Pochettino hote dinhmun derthawngah an awm thei a, French club hian group match hnuhnung berah Club Brugge an mikhual ang.

Chak awlsam
Etihad Stadium-ah Man City-in khualmuala 5-1 a an hneh tawh Club Brugge hneh turin harsatna an tawk lo a, Phil Foden, Riyad Mahrez, Raheem Sterling leh Gabriel Jesus te goal hmangin 4-1 in an chak.

Sterling-a'n match 12 chhung goal a khung loh hnuah scoresheet-ah a hming a nem kai leh a, Belgian club goal awmchhun pawh John Stones-a'n an lama a tihluh palh a ni.

Mualneitu hian inkhel an thunun a, Pep Guardiola pawhin minute 10 a la awmin substitution panga a hmang zo vek. Man City hian kartawpah Manchester United an hmachhawn dawn a, Club Brugge player-te an kat kual dan thlir chuan Ole Gunnar Solskjaer leh a hote pawhin Old Trafford-ah buaina an tawk ngei dawn niin a lang.

Beisei pha lo PSG
Red Bull Arena Leipzig-ah mualneitu RB Leipzig-in Christopher Nkunku hmangin minute riatna lekah goal an khung hmasa a, PSG-in Georginio Wijnaldum hmangin first half-ah 2-1 in an lehthal. Amaherawhchu German club-in na takin an nawr a, injury time-a Nkunku penalty hlawh chu Dominik Szoboszlai-a'n Leipzig siphurh sut nan a hmang.

Penalty pet hmain Neymar-a'n, "I pet goal ang em?" tiin pressure pek nan Szoboszlai hi a zawt a, Hungarian midfielder hian, "Pet goal dawn e, ka hlah ngai lo," tiin inringtawk takin a chhang. Leipzig-in an phu angin point khat hlu tak an hlawh chhuak a, Lionel Messi tel lohna PSG nen 2-2 in an inhnehtawk.

Leipzig manager Jesse Marsch chuan, "Inkhelh ṭantirhah kan khelh ṭha a, a tawp pawh kan khar ṭha. Kan khelh ṭhat zawk avangin point khat chauh kan hmu hi pawi ka ti hle," tiin siphurh suttu ni mah se chak an phu zawk thu a sawi.

PSG manager Mauricio Pochettino chuan, "Kan result avangin ka hlim e, tih chu a har khawp mai. Goal khung belha Leipzig beiseina titawp turin chance ṭha pawh kan nei a, mah se kan bawhpelh. Chutihrualin kan khingpuite an khel ṭha a, point hlawhchhuah an phu a ni," tiin a sawi.