Ajax-in Dortmund an lehthal

Nilaini zan Champions League inkhelah Borussia Dortmund-in an mikhual Ajax lakah Marco Reus a penalty hmangin goal khung hmasa mah se Dutch champion-in goal thumin an chhanglet.

Dortmund defender Mats Hummels chu minute 29-naah hnawhchhuah a ni a, Ajax-in an tamna an hmang ṭangkai. Erik ten Hag hote tan Dusan Tadic, Sebastien Haller leh Davy Klaassen ten goal khat ṭheuh an khung.

Ajax coach Erik ten Hag chuan, "First half-ah kan khel ṭha lo a, tihsual kan ngah. Thlen san zel kan duh chuan insiamṭhat a ngai. Chutihrualin kan khelh ṭhat loh ṭuma team ṭha tak kan hneh hi a lawmawm hle," tiin a sawi a, a khel ṭha tawk lo tih a pawm.

Dutch club tan hian Haller a a khel ṭha zel a, kum 27 mi Ivorian striker hian tun season Champions League match li a khelh tawhah goal la khungin vekin goal sarih a khung tawh a, Bayern Munich striker Robert Lewandowski chiah a tluk lo.

Group C inkhel dangah Sporting Lisbon-in Besiktas 4-0 in an sawp a, Portuguese cham-pion-in point ruk an hmuh tak avangin beiseina an nei thar.

Ajax-in match li khelhah hnehna an chan vek avangin last 16 an lut a, hmun ruak pakhat hi Dortmund leh Sporting ten a inchuh dawn. Club pahnih hi November 24, Nilaini zanah an inkhel dawn a, inkhel pawimawh bik a ni ang.