Vaccine ka la fel tawh - Thiem

Dominic Thiem chuan Covid-19 vanga invenna vaccine a lak kim tawh thu a sawi a, tunah chuan December thlaa khelh tur Abu Dhabi khel tura inbuatsaihna a neih mek thu a sawi bawk.

Tennis season a zo hnai a, season thar a hnai leh kuarh tawh. January thla mai hian Australian Open an khel dawn, inelna thlenna tur state Victoria thuneitu lam chuan invenna la lo chu visa an pek loh tur thu an lo sawi tawh.

Australian Open champion lai Novak Djokovic leh US Open champion Daniil Medvedev te chuan invenna an la ngei dawn em tih an la sawi chiang thei lo a, ruahmanna thar an siam a nih loh chuan Grand Slam hmasa ber khel lo thut thei an ni.

Thiem chuan, "Abu Dhabi leh Australian Open khel turin vaccine lak a ngai tih ka hria, kei chuan harsatna nei loa inkhel turin vaccine ka la kim tawh e. News aṭangin inkaihhruaina ka lo hria a, ka tan chuan thuawih taka zawm mai a fuh," tiin a sawi.

Austrian star hian season hmasa khan US Open nomawi a chawi a, tun season-ah pawh khel ṭha tura beisei a ni. Mahse, hliamin a ti buai - a banrek na vangin August thla hnu lamah a la inkhel leh lo.

Tournament a khelh loh rei avangin Thiem hi a ranking pawh a tlahniam, number 3 dinhmun te hauh hman zak zak mah se tunah chuan pakuana a ni mek a, ranking siam tha turin inelna hmachhawn tam chu a mamawh.