T20 Kûtpui a kal zel
UAE lamah ICC T20 World Cup group stage chanve an thleng chho ṭan a. India ramah BCCI domestic season bul ṭanna first class cricket T20 inelna sang ber Syed Mustaq Ali Trophy khelh ṭan a ni bawk. Thawhṭanni aṭang khan Mizoram lama Sihhmui Cricket Stadium-ah, season khuh hawn nan T20 inelna President's Cup khelh ṭan a ni bawk. Hawina lam apiangah T20 thlipui a tleh a ni ber mai awm e.
India- Battery low?
Nikir thlatir lam aṭanga England an tlawh aṭang khan India-in mahni inlum ngeia laikhuma zal lai reng reng an nei thei lo. Virat Kohli leh a naute tam zawk chu khual khuaah pawh tuipui ral ram hla takah, an hun leh ni te an la chhiar zel. Vawiin thleng hian UAE lamah World Cup khelin an la cham zui ta reng.
Indian Premier League lamah rilru leh taksa rim takin an chhawr a, inelna an zawh meuh chuan T20 khelh a hun der. Pakistan leh New Zealand bakah ram dangte chuan chawlh hahdamna hun an nei ṭha a, tha tharin inelna an hmachhawn thei. Shaheens leh Black Caps te chuan an chezia leh mitmeng ena chau leh chawlh mamawh tih hriat India team chu an tukzal a ni ber mai.
World Cup ṭan hmain tuin nge hetiang boruak hi a thleng ang tih ring bik ang le? Nilaini zan khan Men in Blue hian Afghanistan sawp mah se semifinal invaw kai tur chuan inkhel dang result-ah innghah a ṭul tawh. India meuh ram dang inkhel result-a an innghah takah chuan, "Kan khel ṭha tawk lo tih hi pawm tur," an tih ṭawngkam hian a khaikhawm viau awm e.
Technical & Tactical
T20 leh 50 overs inkhelah tun hnai India team-te hian vuak hnuhnun a, target um hi an thiam a, an duhthusam pawh a ni. Amaherawhchu Pakistan leh New Zealand lakah ṭhumvawrah an vanduai ve ve a, vuak hmasak a ngai. An hmel leh chezia a zamna deuh leh beidawnna awmsa deuh hi tun hnu atan a rang lama an insiamrem ngai lai a ni ngei ang.
Pakistan an hneh loh ṭuma inkawp Rohit Sharma leh KL Rahul te chu New Zealand lakah an thlak a, pressure sanna inkhela opening pair an han thlak thut khan awmzia a nei tam lo khawp mai. Series leh tour velah chuan thil ṭha tak pawh a ni thei a, mahse ICC World Cup level angah chuan thil zawngchhang thlak lutuk lo a ni tih a chiang awm e.
A thlaktu Ishan Kishan lah batter patuaitir a nih avangin inelna sangah lei rem la rap lo a lo ni lehzel nen a fuh lo vel vek a ni ber. Ziak hmasa lama kan hlauhthawnna kan lo thailan, team management lamin all rounder anga khel si, Ravindra Jadeja leh Hardik Pandya te tih tur tun thlenga a la hriat chian thei loh avangin team balance nasa takin a nghawng tih hai rual a ni lo.
Cricket purist (duh tui mi) ṭhahnem tak chuan all rounder hian batting emaw bowling emaw master tho se an duh. Mimal tak pawhin cricket purist te ngaihdan hi ka ṭawmpui a, batter ṭha tak ni chunga bowling a theih tho chuan bonus a ni mai. Chutiang bawkin bowler ṭha tak ni chunga batting a theih chuan bonus a ni a, all rounder atana batting leh bowling-a player laihawl ni ve ve hi chu ka pawm zawng a ni lo.
The Good, The Bad & The Auch
Virat Kohli thar an tih Pakistan Babar Azam a thiamzia khawvelin a hmelhriat leh zual a, England veteran Jose Buttler-a te an hlauhawm ngaiin an la hlauhawm reng bawk. Cricket ram ropui Australia erawh tun generation an uai thla ṭan deuh tiin a sawi theih a, mah se stage sangah Aussies hian an theihna an lantir leh ṭhin.
Cricket ram ropui ṭhin dang West Indies leh Sri Lanka erawh revival a thlen a ngai takzet tih a chiang. Chutihrual chuan cricket khawvela tun World Cup platform hmang ṭangkaia mi zawng zawng rilru hnehtu Namibia lamah cricket harhna a thleng mek thung. IPL season khat han chet 'hit' thut hi International level-a insurance neihna a ni lem lo tih min kawhhmuh turin Varun Chakravarthy te kan hmu.
Domestic cricket first class pawh chhiar tham lek la khel a nih avangin Tamil Nadu bowler Chakravarthy tan bul ṭan ṭhat leh a ṭul ni te pawhin a lang. Kum 30 mi Chakravarthy hian kawng thui leh lamlian dika kal hmasak ṭangkaizia a zir chhuak ngei turah ngai ila.
Tournament chanve kan hmang zo a, a chanve dangah hian thil ṭhahnem tak kan tawng leh zel turah i ngai phawt ang.
- K. Vanlalruata