Zanin dar 6:00-ah Manchester Derby

Premier League inkhel hmuhnawm bik zinga mi Manchester derby chu zanin dar 6:00 hian Old Trafford-ah khelh a ni dawn. Result ṭhat tawk loh vangin Man United manager Ole Gunnar Solskjaer chu hna chan thei dinhmunah ding a, chutihrualin zanina Manchester City an hneh a nih chuan Pep Guardiola hote nen an point hmuh zat a inang ang.

Ole vs Pep
Norwegian manager Solskjaer hian Guardiola kaihhruai team ṭum riat a hmachhawnah vawi li a chak a, Barcelona manager hlui ṭum nga hmachhawn tling zingah record a nei ṭha ber.

Pep-a hian vawi thum hnehna a chang thung a, Old Trafford-a league match an khelh hnuhnun berah goal awm loin an inhnehtawk. December 12, 2020-a an intum ṭumah chauh hian chak zawk an awm lo.

Manager pahnih intum tawhna bik khaikhin chuan an intluk tawk a, amaherawhchu an hlawhtlinna leh an dinhmun thlir chuan inkar a hla hle. Pep-a hnuaiah Man City-in nomawi 10 an chawi tawh a, chung zingah chuan Premier League nomawi pathum a tel.

Man City-in Spanish manager chan an hlau a, chelh dan kawng an zawng. Ole erawhin Man United hi nomawi a la chawipui lo a, tunah phei chuan ban theih dinhmunah a ding mek.

Chhandamtu Ronaldo
Nipui bazarah Man City-in Harry Kane an lak theih loh hnuin Cristiano Ronaldo nen sawi zawm an ni a, Portuguese forward hian a club hlui leh a larchhuahna Man United pan a thlang ta zawk.

Kum 36 mi Ronaldo vangin Man United-in team angin an khel thei lo a, an chet chhiat phah ti tawk awm mah se Portuguese forward hian goal pawimawh a la khung zel. Football-a harsa ber goal a khung theih miau avangin Ronaldo sawi nep theih a ni lo.

Portugal captain hi Tottenham leh Atalanta lakah Man United chhandamtu a ni a, chutihrualin Liverpool lakah erawh dah ṭhatin a awm. Man City lakah hian Ronaldo hi chhandamtu nge a nih dawn team tana hnawksak tih chu inkhelh hunah a hriat ang.

United chu...
Ronaldo-a'n hmun pawimawh a chang leh dawn a, a kawppui tur erawh a la chiang lo. Tottenham an hneh ṭumin Ronaldo leh Edinson Cavani te an inkawp rem. Atalanta lakah Uruguayan forward hi bench-ah awm mah se Solskjaer-a'n a hahdamtirah a ngaih theih.

Man City lakah hian Ronaldo leh Cavani te an inkawp lehnghal thei a, chutihrualin Man United tlarhnung buaina hian tlarhma a nghawng tel thei bawk. Inhliam vangin Raphael Varane a chawlh rih a ngai dawn a, inhliam vang thoin Italy-ah Victor Lindelof a zin thei lo.

Solskjaer-a'n centre back pathum a chhawr dawn a nih chuan Lindelof a dam hman a ṭul dawn a, Swede defender hi Harry Maguire leh Eric Bailly te nen an inkawp thei ang. Defence laiah defender pahnih emaw pathum pawh awm se defensive midfielder pahnih a chhawr a rinawm a, Scott McTominay leh Fred te an ni thei ang. A tawi zawng chuan Solskjaer-a'n goal khung aiin goal venhim a ngai pawimawh hmasa ang.

Goal venhim an ngai pawimawh hmasa a nih chuan Paul Pogba, Marcus Rashford, Mason Greenwood leh Jadon Sancho te tan bul ṭan a harsa dawn. Chutihrualin counter attack hmanga nawr an duh a nih chuan player tlan chak an mamawh dawn a, Rashford-a'n bul a ṭan thei bawk.

City ve thung
Manchester City-in league match hnuhnung berah Crystal Palace an hneh lo a, an chak lohna zat pawh 2-0 ngawt ni mah se khelhdan nghet an neih avangin an buai ve lo. Champions League-ah an thiamzia an pholang a, Etihad Stadium-ah Club Brugge an kat hrep a, 4-1 in an chak.

Old Trafford-ah pawh Pep Guardiola hote hi an inthlahrun a rinawm lo a, Ferran Torres chiah inhliam an neih bawk avangin derby hmachhawn turin an inpeih. Chutihrualin Man City hian league nomawi humhim an duh a nih chuan Liverpool nena an inkar tizim turin chak ngei an mamawh a, pressure nei lo tawp erawh an ni bik lo.

Man City midfielder Bernardo Silva chuan, "Cristiano hi inkhel tidanglam theitu a ni a, chelh kan tum dawn. Chutihrualin Cristiano kan hmachhawn dawn lo a, Manchester United nen kan inkhel dawn. Kan tih tur ṭheuhah kan chiang," tiin a sawi a, ram tana khelhpui Ronaldo a dahsan thu a sawi lang.