Tierney a dam tawh - Arteta

Arsenal manager Mikel Arteta chuan an player inhliam ṭhenkhat an dam tawh thu a sawi a, defender Kieran Tierney pawh tun kar tawpah a inlan theih a beiseiawm tawh - Gunners tan thu lawmawm a ni ang.

October thla khan Arsenal leh Crystal Palace inkhelh ṭumin Tierney hi a kerek a hliam, a awm loh hlanin player thar Nuno Tavares chuan a hmun ruak a lo hnawh khat ṭha viau; a dam hnuah pawh elpui hautak a nei tihna a ni.

Arteta chuan, "Kieran hian ni hnih chhung chu team training pangngai a zawm tawh, a dinhmun a ṭhat tawh avangin a inkhelh theih tawh ngei pawh ka beisei," tiin a sawi a, tun kar tawpah a chhawr ngei dawn em tih erawh a sawi tlang duh lo.

Gunners hi tun hnaiah an academy chhuak an khel ṭha thin a, season hmasa aṭangin Bukayo Saka chu rinrawl a ni - season kal laiah Emile Smith Rowe chuan hmun pawimawh a chang leh ta mek bawk.

English rawlthar Smith Rowe hian tun season match sarih a khelh aṭangin goal li a khung tawh a, season hmasa pumpuia a goal khung zat chu a tluk der tawh - tun season atan thla hnih chauh hun an la hmang.

Tun hnaia England squad puanah Smith Rowe hi a tel lo, koh a nih loh chhan media zawhna chhangin England manager Gareth Southgate chuan, "A tel ṭep," tiin a chhang a, nakkum World Cup-a Three Lions kawr ha turin Gunners tana a khelh ṭhat a pawimawh.

Arsenal hian Pathianni zan dar 7:30 hian Emirates Stadium-ah Claudio Ranieri kaihhruai Watford an mikhual dawn a ni.