MFA-in football Inkhawmpui hmang ; Kum 2022-ah ram pum huap football kalpui theih beisei
Mizoram Football Association (MFA) leh Mizoram Youth Commission (MYC) ṭangkawp chuan nimin khan Aizawla Synod Conference Centre-ah Football Symposium an buatsaih.
Chawhnu lamah MFA leh District hrang hrang Football hruaituten Special General Body Meeting an nei zui a, kum 2022 aṭangin Mizoram pum huap inelna kalpui theih an beisei.
Football Symposium
Kawng hrang hranga Mizoram Football hmasawnna tur sawiho a ngaihtuahna hun - Mizoram Football Symposium-ah hian MFA development officer Samson Ramengmawia chuan coach education leh player's registration chungchang a hriat tur pawimawhte a sawi a. AIFF match commissioner R Malsawma'n Refereeing Education chungchang a sawi bakah match commissioner ni tura thil pawimawhte a sawi. Hmingthansanga chuan Grassroots & Youth Development chungchang a sawi bawk.
Resource person-te hian Mizo ṭhalaite zingah football khel thiama eizawng India ram club hrang hrangah tam ve hle tawh mah ila, coaching lamah thleng sang tak kan la awm loh thu te, refereeing lamah pawh thleng sang kan la awm loh avanga tan lak a ṭul zia te, football a hmasawn tak tak turin naupang grassroots atanga theihtawp chhuah a hmalak a ṭul ziate an sawi a. District FA hrang hrang hruaituten an hriat duhte zawtin Resource person te leh State FA hruaituten inhrilhhriat ngaite an hrilhfiah a ni.
Special General Body Meeting
Chawhnu lamah MFA president Lal Thanzara kaihhruaiin special general body meeting an nei zui a, kum 2021-2022 season a football kalpui dan tur an rel ho a ni.
MFA honorary secretary Lalnghinglova Hmar chuan report pein, nikum aṭanga hri lengin Mizoram a football kalphung a tihbuaizia a tarlang a, chutih ruala football leh a kaihhnawih thil kalpui a nih dante a sawi.
India ram hmun dangah hri lêng boruak a zia tak deuh avanga Santosh Trophy buatsaih tur a nih thu leh Mizoram team inpuahchahna a sawi a; National Senior Women's Football Championship khek tur team-te camp neia an inbuatsaih mêk thu a sawi bawk.
Season calendar
Nakkum May thleng daih 2021-22 season chhunga football inelna kalpui dan tur relho a ni a; tun dinhmunah hri avangin inkhelh la ngam awm lo mah se, dinhmun a ziaawm chuan nakkum aṭanga ram pum huap inelna kalpui ṭan an rel a, kuminah pawh District Football Association chu an district chhungah thuneitute rawn chunga inelna kalpui phalsak an ni.
Kum thar lamah boruak a that zel chuan District hrang hrang inelna kalpui leh an rem ti thung a, District FA hrang hrangin thlen an inhuam thu an sawi hlawm a ni.
Kumthar lamah hri lengin ziaawm lam a pan a, sorkarin rem a tih chuan MFA Cup khelh ni se tih a ni a, a thleng turin Saitual DFA an ruat. Junior Boys Under 17 championship thleng turin Siaha DFA te an ruat a, Women's championship thleng turin Hnahthial DFA te ruat an ni bawk.