Chanmari Zothan-in Super Spikers an hneh lo

All India Football Federation (AIFF) hriatpuia India ram pum huap futsal inelna hmasa ber Hero Futsal Club Championship chu nimin khan Delhi-ah khelh ṭan a ni a, Mizoram aiawha tel Chanmari Zothan Futsal chuan match hmasa berah Super Strikers Futsal Club chu 6-4 in an hneh lo.

Karnataka champion Super Strikers-in Surya hmangin goal hnih a khung hmasa a, first half-ah vek Chanmari-in David Laltlansanga leh George MS Dawngliana te hmangin an sut.

Team ṭha zawka ngaih Mizo club-in second half-ah hnehna an chang mai turah ngaih theih mah se Bengaluru club Barry Anand Francis hmanga hma an hruai nawn bakah Vijay-a'n goal hnih a khung belh a, 5-2 a ni.

Hun tawp dawn hnaihah H. Lalmuankima leh Lalrinsanga ten siphurh sut ṭhen leh mah se result erawh a danglam pha ta lo. Group A inkhel dangah Mohammedan-in Baroda 9-0 in an sawp a, group khat aṭanga pakhat chauh tlang tur a nih avangin Chanmari Zothan dinhmun a ṭha lo.

Mizoram manager Hmingthan-zuala chuan, "Inkhelh hma boruakin kan inkhelah nghawng lian tak a nei. CRS hman a ni a, player lamah chuan buaina kan nei lo a, coaching staff erawh inkhelh dawn thlengin kan buai a, assistant coach leh physio te chiah team bulah an awm. Covid-19 vangin kan coach Samuel-a a zin ve thei lo bawk nen kan inkhelah nghawng lian ta a nei a ni," tiin an lungawi loh thu Vanglaini an hrilh.

Chanmari Zothan hian November 7, Pathianni chhun dar 12:00 hian Baroda an hmachhawn dawn a, insiamrem theihna hun ṭha an nei dawn. Tlai dar 2:30-ah Super Strikers leh Mohammedan te an inkhel leh bawk ang.