Lukaku a dam hnai

Chelsea striker Romelu Lukaku chuan tun hnai khan training a neih theih thu a sawi a, beisei aia hmain Blues hian an player pawimawh hi an chhawr thei dawn a ni mai thei.

October 21 khan Chelsea hian Malmo 4-0 in an sawp, he inkhelah hian chak mah se Lukaku chu a kerek a hliam. A hliam vang hian tun thlengin a la inkhel leh thei lo, ani bakah Timo Werner a hliam mek avangin manager Thomas Tuchel-a'n tlarhma lamah duhthlan tur a neih tlem phah hle.

Belgium international Lukaku chuan, "Ka tlan leh thei ta," tiin a sawi a, tun kar tawpah a la inkhel thei chiah lo a nih pawhin Blues ṭantute tan chuan chanchin lawmawm a ni phak tawh.

Premier League hmahruaitu Blues hian zanin dar 8:30 hian Burnley an mikhual dawn, an hnuaia awm Liverpool nen an inthlauhna chu point hnih lek a nih avangin Tuchel-a naute tan chetsual a thiang lo.

Chelsea hian season an hmang tluang viau, league bikah chak loh vawi khat chauh an la nei. Champion lai Manchester City leh Reds chunga an awm theih miau avangin Blues-in bul an ṭan ṭhat dan hi inhrilh nawn a ngai kher lo.