Europa League-ah Leicester chak zo lo

Leicester City-in Europa League knockout round luh an beiseina a tlem sawt zel - an mikhual Spartak Moscow chu 1-1 in an inhnehtawkpui a, group C-ah pathumna an ni mek!

Spartak tan Chelsea winger hlui Victor Moses chuan goal hmahruai a khung a, Daniel Amartey chuan Foxes tan a chhanglet. Mahse, Jamie Vardy-a'n penalty a pet goal lo a, draw result-ah lungawi an zir a ṭul.

Premier League-ah pawh che fuh hleithei lo Leicester hi Pathianni zan dar 7:30-ah league match an khel zui dawn a, khualmualah Leeds United an lenchilh ang.

Europa inkhel ngaihven hlawh dangah Rangers an chak zo bik lo a, Steven Gerrard-a enkawl team hian Brondby IF chu khualmualah 1-1 in an inhnehtawkpui hram.

Beisei loh
Leicester-in inkhel an thunun a, mahse, goal erawh an khung thei lawk lo. Boubakary Soumare-a'n crossbar a tih per a, goal khung hmasa erawh Spartak an ni - Moses chuan minute 51-naah Mikhail Ignatov cross aṭanga ball kal chu a tauh lut a, hma an hruai der.

Mahse, minute 10 em pawh a liam hmain Foxes tan Amartey chuan Ayoze Perez-a ball tauh per chu a tauh goal a, 1-1 a ni. Spartak nen an intawn hmasaka goal li khungtu Patson Daka a hriam tawk lo a, minute 20 a la awm tihin bench-a dah Vardy chuan a thlak.

Mahse, English striker hi a team chhanhim tu ni loin hun ṭha khawhraltu a chang. Moses-a'n Ademola Lookman a tih tluk avanga a penalty chawi chu a pet turin Vardy a lo pen chhuak a, a goal lo!

Striker tawnhriat nei ṭha Vardy-a'n a pet ṭha tawk lo a, Russian club goalkeeper Aleksandr Selikhov tan dan harsa a ni lo - hun tawp thlengin goal dang a lut lo a, 1-1 in an inhnehtawk.

Rangers beiseina
Brondby IF-in an mikhual Rangers lakah goal an khung hmasa a, Scottish club defender Leon Balogun chuan Christian Cappis ball tauh aṭanga ball kal chu an lamah a ti lut palh.

Inkhel ṭantir lama Alfredo Morelos leh Fashion Sakala hmanga chance duhawm neitu Rangers zawkin si an phur a, an chak loh chuan knockout round luh beiseina a tlem dawn.

Mahse, Gerrard-a'n second half-ah substitution a siam fuh a, Morelos, Sakala leh Scott Arfield la chhuakin Ianis Hagi, Kemar Roofe leh Ryan Kent a luhtir a, Rangers goal nawr a na sawt.

Minute 77-naah Liverpool academy chhuak Kent-a ball pek chu Hagi-a'n a um lut a, harsatna nei loin goal-ah a chantir. Rangers-in khualmualah point an hlawh chhuak a, group A-ah pahnihna Sparta Prague nen point 4 ve ve neiin knockout round luh beiseina an la nei ve zel.