Messi dinhmun chiang thei lo

Paris Saint-Germain a zawm hnuah Lionel Messi-a'n tun hma lama a ropuina ang a la chhawp chhuak thei rih lo a, tunah chuan khup hliam vangin a buai mek. Zanin dar 1:30-a Bordeaux an hmachhawn hun atan pawh a dinhmun a chiang lo.

Barcelona captain hlui hian PSG tan Ligue 1-ah goal a la khung miah lo. Champions League lamah erawh goal thum a khung tawh, mahse RB Leipzig nen UCL an khelh ṭumin hliam vangin a inlan thei lo, a khup vangin a buai ngun ve ta hle.

Tun kartir lam khan Madrid khawpuiah Messi hi hmuh a ni a, a hliam enkawl tura kal a ni. Coach Mauricio Pochettino tan pawh Messi hi eng ang taka chhawr theih tur nge hriatthiam a harsa rih mai thei - zaninah a inlan a nih pawhin dim deuh chu a la ngai ang.

PSG-in Messi an lakluh chhan tak erawh Ligue 1 ni loin Champions League a ni. League lamah an chhawr rim tawk lo a nih pawhin tun thla tawpa Manchester City an lenchilh hunah chuan Messi hi 100% a dam chung ngeia inlan tir an duh dawn.