Milan Derby Boruak a sang leh dawn chiang

Khelmual an inṭawm a, khaw khat chhuak an ni bawk - AC Milan leh Inter Milan te chu Pathianni zan dar 1:15 hian San Siro-ah an inkhel dawn; tun ṭumah hian Milan chu mualneitu zawk an ni ang.

Football hian chanchin ngaihnawm tak tak min chhawp chhuahsak ṭhin a, a bik takin 'Derby' a nih phei chuan chanchin a ngah zual bik ṭhin. Derby hrang hrang zingah Milan leh Inter inkhel aia boruak sang hi a tam bik chuang lo.

A chungah Milan
AC Milan hian tun hma deuh khan an manager Stefano Pioli hi ban an tum, a thlakna tur pawh an be hman hial. Mahse, Pioli hian season hmasa khan nasa takin Milan hi hma a sawnpui - Serie A pahnihna a nihpui thei hial.

Tun season-ah ṭha takin bul an ṭan leh a, match 11 an khelh tawh chinah tlawm an la nei miah lo. Italian football inelna sang berah hian season bul an ṭan ṭhat ber ṭum an tawng; hmahruaitu Napoli nen an point a inzat mek avangin league bikah chuan team ṭha ber zinga mi an ni mek.

Zlatan Ibrahimovic awmna an nih avangin Milan boruak a lian. Swede striker hi Inter tan pawha khel tawh a ni a, Italian football a hriatchian tawh avangin Inter tana ven uluk ngai ber tur a ni dawn - kum 40 mi ni tawh mah se a la ṭha tawk tih hriat a ngai ang.

Milan buaina chu tlarhnung lam a ni dawn. Theo Hernandez chu hrem vangin a inlan thei dawn lo, a hmun ruak luah ṭhin Fode Ballo-Toure hliam a la dam lo bawk. Inter winger ṭha Ivan Perisic dang thei tur an inzawn uluk a ngai dawn tihna a ni.

Champion lai Inter
Pioli hnuaia Milan khelh ṭhatzia an sawi a, season hmasa lama an tluk loh chu Inter Milan hi an ni. Antonio Conte leh Romelu Lukaku te hmun ruak hnawh khah a harsa a, chutih rualin manager Simone Inzaghi-a'n team nghet tak a din leh tawh.

Milan nen Serie A bika an intawn hnuhnung parukah vawi nga hnehna an chang thei, ṭum khat chiah chak loh an nei - goal 14 khungin anmahni lamah goal ruk a lut thung, tun hnai an intawn tawhna thlir chuan tun ṭumah pawh hian chak tura rinkai zawk an ni.

Inter tan striker Lautaro Martínez chu player pawimawh a ni leh dawn a, league goal nga khung tawhtu Argentina striker hi Edin Dzeko nen an inkawp fuh leh a nih chuan tlarhnunga hliam ngah Milan tan hna a hautak khawp ang.

Kum 45 mi Inzaghi chuan, "Italian chauh ni loin khawvel huap pawha inkhel ngaihven hlawh a ni a, a chak lo zawka ṭan hrehawmzia chu inhrilh nawn a ngai lo. Chuvangin hamrik hnuhnung a rik huna hlim zawk nih kan tum ang," tiin a sawi.