Monfils a inkhel thei lo

Novak Djokovic nena Paris Masters last 16 khel tur Gael Monfils a inlan thei lo a, inkhelh hah ngai loin world number 1 Djokovic hian quarterfinal a luh theih phah - semifinal lut tur chuan Taylor Fritz a hneh leh a ngai thung ang.

Monfils hian a match hmasa zawkah Adrian Mannarino a hneh, an inkhelh zawhin a tihrawl a hliam tih a sawi a, na tak a nih loh avangin inkhelh chhunzawm theih a beisei. Mahse, beisei anga a dam nghal mai loh avangin a chawlh a ngai ta zawk.

A tan season a tawp thu sawiin Monfils chuan, "Ka hliam hi ni 10 chhung vel chuan a dam mai ang. Mahse, 100% ni leh tur chuan hun ka mamawh deuh ang," tiin a sawi a, season tharah beiseina sang zawk nen lo kir leh a tum.

Inkhel dangah world number 2 Daniil Med-vedev chuan Sebastian Korda chu 4-6, 6-1, 6-3 in a hneh. US Open champion hian a match lehpekah chuan Hugo Gaston a hmachhawn ang. Gaston hian Carlos Alcaraz chu 6-4, 7-5 in a hneh ve bawk a ni.

Casper Ruud pawhin hnehna a chang, a khingpui American tlangval Marcos Giron chu 6-2, 6-1 in a hneh a, a tan chanchin lawmawm bik a ni. Quarterfinal a luh avang hian ATP Finals atan a tling - Norway mi zingah hetiang dinhmuna ding thei hmasa ber a ni hial.

Ruud hian a match lehpekah chuan Alexander Zverev a hmachhawn leh dawn. Greman star hian Bulgarian mi Grigor Dimitrov chu 7-6, 6-7, 6-3 in a lo hneh ve thung a ni.