Conte hoin Tottenham an chak

Antonio Conte chuan Tottenham Hotspur manager a nih hnua a match hmasa ber a hmachhawn a, duhthusama ṭhain khel chhuak nghal lo mah se Ningani zan khan an mikhual Vitesse chu 3-2 in an hneh.

Tottenham Hotspur Stadium-a inkhelah Son Heung-min (14') leh Lucas Moura (22') ten goal an khung, defender Jacob Rasmussen chuan anmahni lamah a ti lut bawk. Mikhual team lamin chawlhlawk hmain Rasmussen leh Matus Bero te hmangin an sut ṭhen.

Second half tir lamah Spurs defender Cristian Romero chu Lois Openda laka a foul vangin an hnawt chhuak. Dutch club lamin beisei an nei sang a, si phurh pawh sut thei tura ngaih an ni. Mahse, hun tawp dawn lamah Danilho Doekhi leh Markus Schubert ten red card an hmu a, an beiseina a thamral nghal.

Hmasawn a ngai
Italian manager Conte-a'n Chelsea leh Inter Milan a enkawl laia a tih ṭhin danin tlarhnungah player pathum - Romero, Eric Dier leh Ben Davies te a chhawr leh a, wing back hman ṭangkai leh a tum, a match hmasa berah hnehna chang mah se tlarhnung a pawp nasa hle.

Spurs manager thar Conte chuan, "Hmasawnna tur kan la ngah hle, mimal tinin nasa taka hma kan sawn a la ngai, chutiang tur chuan theihna pawh a awm. Thil tum mumal tak neiin hma kan la chhunzawm nghal zel ang.

"Kan tum ram thleng tur erawh chuan dawhtheihna kan mamawh dawn, taksa leh rilru tih hmasawn a ngai. Ka naute pawhin ka duh dan an hriat chian hmasak a ngai dawn a, chumi tur chuan hun kan mamawh deuh dawn," tiin a sawi.

Hmabak Everton
Tottenham hian Pathianni zan dar 7:30 hian Premier League khel turin Everton an lenchilh leh nghal dawn. Goodison Park hi Rafael Benítez-a'n hna a thawhna hmun a ni a, manager tawnhriat ngah a nih avangin Spurs tan a awlsam dawn lo.

Blues tana EPL nomawi chawi tawh Conte hian North London club hi nomawi eng emaw ber chawi pui a tum dawn, chutih rualin league a ngaih pawimawh tel a ngai dawn - tun hnaia result nei ṭha lo tak an nih avangin inbuatsaih uluk a ngai khawp ang.

Conte chuan, "Hmabak sawi lawk thui vak theih a ni lo, tunah chuan a tlachawp zela kan tih phawt a ngai. Kan squad hi kan en chuan team ṭha tak ni thei tur kan ni, chuvangin an theihna anga khel chhuak tura ka puih an ngai," tiin a sawi.