Haaland a chawl rih dawn

Alf-Inge Haaland chuan a fapa Erling Haaland chu kuminah a khelh hman a beisei loh thu a sawi. Borussia Dortmund chuan zanin dar 11:00-a RB Leipzig an tlawh hunah an striker pawimawh hi an chhawr thei lo ang.

Haaland hian inhliam vangin Dortmund match hnuhnung paliah a khel tawh lo a, Marco Rose leh a hoten Norwegian striker tel loa khelh an zir a ṭul dawn a ni. Leipzig zawh hian Dortmund-in VFB Stuttgart, Sporting Lisbon, Wolfsburg leh Bayern Munich te an hmachhawn dawn a, Lisbon leh Bayern an hmachhawn tur hi inkhel pawimawh bik a nih avangin Haaland awm lo tur hi channa nasa tak a ni ang.

Halaand-a pa Alf-Inge Haaland chuan, "Krismas hmaa a inlan hman a nih chuan chanchin ṭha lam a ni dawn a, a thlen theih erawh a beiseiawm loh thung," tiin chawlh rih a mamawh tur thu a sawi.

Kum 21 mi Haaland hian tun season-ah league match vawi ruk khel tawhin goal kua a khung der tawh a, inelna hrang hrangah goal 13 a khung tawh. Norwegian striker hian Bundesliga bikah goal 49 a khung tawh a, half century khung naupang ber leh rang ber ni thei turin a dinhmun a ṭha hle.