West Ham an chak; hmabak chu Liverpool

David Moyes-a kaihhruaina hnuaiah West Ham chuan Europa League knockout stage lut turin Genk chu 2-2 in an inhnehtawkpui a, Moyes hian football coach zinga match 1000 team kaihruai thei tlemte zingah a hming a ziak kai nghal bawk.

Genk khelmualah mualneitu team tan Joseph Paintsil chuan minute lina lekah goal hmahruai a khung a,

Hammers tan Said Benrahma chuan goal hnih hmangin a chhanglet - mahse, minute 87-naah Tomas Soucek chuan an lamah a ti lut palh a, Genk-in si phurh an sut zo.

Moyes-a'n a match 1000-na chak result nen lawm duh viau mah se a beisei ang result a nei lo a, knockout round an luh tho avangin chuti taka hnual tur erawh a ni lo - Pathianni zan dar 10:00 inkhel turin Liverpool-in an lo hmuak zui.

Liverpool hi Champions League last 16 lut hlim an ni a, group of death ti meuha an chhal group aṭanga an match hmasa palia chak vek thei an ni. Jurgen Klopp-a nauten point thum aia tlem an mitthla lo ang.

A 'hot' dawn
Moyes enkawlna hnuaiah West Ham-in beisei phak bakin season an hmang ṭha a, match 10 an khelh tawhah vawi hnih chiah la tlawmin table-ah palina an ni mek.

Liverpool-in league match 10 an khelh tawhah tlawm la nei lo mah se vawi li draw result an nei a, hmahruaitu Chelsea chu point thumin an phak loh phek hmah.

Chu chauh a ni lo - West Ham nen an inkarah point hnih chauh a awm a, mahni muala khel tur Hammers hian hnehna an chang a nih chuan Liverpool hi point khatin an tlanpel daih dawn tihna a ni.

Champion tum Liverpool tan Hammers khelmualah tlawm a thiang lo tihna a ni a, chutihrual chuan an match hnuhnung berah Brighton & Hove Albion an inhnehtawkpui avangin Moyes-a naute hian an zuam ang.

A hautak dawn
Moyes-a'n Europa League-ah a neih ṭhat ang berin a team khelhtir lo mah se a squad a chhah tawk lo a, a duh angin player a hahdamtir thei lo - Belgium a zin chau Hammers player tan Liverpool ber kher mikhual hi a châkawm lo.

Liverpool hi European football khel chau ve tho an ni. Mahse, anni erawhin zin chau loin Anfield-ah Atletico Madrid an mikhual a, anni aia inkhel hnuhnung zawk leh zin chau Hammers ai chuan an hahdam.

Hetihlai hian West Ham player ṭha mi Declan Rice erawh a zam lo. English midfielder chuan, "Liverpool nihna kan hria a, world class team an ni. Kil tinah player ṭha tak tak an kawl a, mahse, international break hmaa kan match hnuhnung ber a ni a, kan theihtawp kan chhuah dawn.

"Eng nge hloh tur kan neih chuan? Top four-ah kan awm a, mi beisei loh result thlentir tumin kan thawk chhuak dawn a ni," a ti a, Liverpool hneh theih a inbeisei.

Salah telna
Liverpool inkhel sawi dawn chuan Mohamed Salah hming hi lam loh theih a ni lo a, Pathianni zanah pawh West Ham player tan ven bik a fuh ang - Rice nena an inhmachhawn tur hlei hleite hi inkhel ti en châkawmtu a ni.

Salah hian tun season inelna hrang hrangah match 14 khelin goal 15 a khung tawh a, assist vawi ruk a nei bawk - Roberto Firmino-a'n hliam tenau nei mah se Salah thlawp turin Sadio Mane (8 goals) leh Diogo Jota (5 goals) an la awm cheu.

West Ham hian goal khung harsat lo Michail Antonio (7 goals) an nei ve tho tih hriat a ṭha a, Said Benrahma, Pablo Fornals leh Jarrod Bowen te pawh tlarhnung tana hnawksak thei tak an ni.

Liverpool hi Brighton laka goal hnih chhuahtu an ni tih chu Hammers hian an thinlungah an vawng rengin a rinawm a, Pathianni zan inkhel a hmuhnawm loh ring suh.