Barcelona coach thar Xavi

Catalan club talbuai Barcelona fan-ten chanchin lawmawm hriat tur an nei ve ta a, club legend Xavi chuan Barcelona a enkawl dawn tih a chiang ta.

He thu buatsaih a nih lai hian Barcelona lamin thuchhuah la siam lo mah se Xavi enkawl lai Al Sadd chuan an coach hi Catalan club pan an phalsak thu an puang a, Barca-ah Xavi a haw ngei dawn e.

Kum 41 mi Xavi hian Barca-ah kir a beisei thu a lo sawi tawh a, Al Sadd lam pawhin an coach duhthlanna zahsakin a kawng an dal reng duh ta bik lo.

Barcelona hian zanin dar 8:45-ah league match khel turin Celta Vigo an lenchilh zui dawn a, zaninah erawh Xavi hian Catalan club hi a la kaihruai hman kher lo ang.

Mangṭha Xavi
Al Sadd chuan thuchhuah siamin, "Barcelona chuan contract-a inziak angin Xavi release clause pek an rem ti a, Al Sadd chuan kan coach hi a chhuah kan remtihsak ta a ni," an ti a, a man zat erawh an puangzar lo.

Qatari club chuan, "Barcelona thawhpui zel turin kan inpeih e," an ti bawk a, Catalan club legend chu an club chanchina hmun pawimawh changtu a nih thu an sawi bawk.

Barcelona hi La Liga match 11 an khelh tawhah vawi li chiah an la chak a, vawi li draw result neiin vawi thum an tlawm a, table-ah pakuana dinhmun an luah mek.

Hei chauh a ni lo - Champions League match li an khelhah point ruk chauh an la nei a, last 16 lut turin hmabak an la nei ko hle. Hna hautakin Xavi a hmuak a, a hmachhawn dan tur hriat a châkawm ta.

Xavi leh sulhnu
Kum 41 mi Xavi hian kum 2015 khan Barca chhuahsanin Al Sadd hi a zawm a, kum 2019 khan inkhelh chawlhsanin Qatari club enkawl hna a thawk zui nghal.

Al Sadd tan Qatar Stars League, Qatar Cup, Qatari Super Cup leh Emir of Qatar Cup-ah te champion nomawi a chawi vek a, a team game a mawi ṭhin viau bawk.

Barca-in October 27-a Ronald Koeman an ban khan a hmun ruak luah turin Xavi hming lam rik nghal a ni a, bazar titi ang leka ngaih kha tunah chuan a tak ram a chang ta.

Catalan club president Joan Laporta chuan, "Xavi hian Barca a la enkawl dawn tih ka sawi fo ṭhin a, a hun erawh sawi theih a ni lo," tiin a lo sawi tawh ṭhin a, Barca fan-ten an ngaihsan, an fapa rangkachak an lawm kir leh dawn e.