Magpies leh Howe an inhnaih

Newcastle United chuan an coach thar turin Eddie Howe an lalut hnai a, he thuziak i chhiar meuh chuan Bournemouth coach hlui hi an lalut fel tawh hial ang.

Magpies hian zanin dar 11:00-ah Brighton & Hove Albion an lenchilh dawn a, he inkhelah hian Howe-a'n team a kaihruai tawh tura ngaih a ni.

Khawthlang media-ten an tarlan dan chuan Howe hian kum 2024 thleng St. James' Park-a cham turin contract a ziak a, coach ṭha tak ni mah se Magpies fan-ten neitu thar an neih tirha an coach beisei ang chu a ni kherin a rinawm loh.

Newcastle hian an ban tak Steve Bruce hmun luah turin Villarreal manager Unai Emery, Tottenham Hotspur manager thar Antonio Conte, Barcelona legend Xavi leh Germany manager hlui Joachim Low te pawh an bia a, mahse, an hnar vek.

Roma manager hlui Paulo Fonseca hming pawh lam rik zingah a tel a, a tawpah erawh Howe lam an hawi ta - Magpies player neih sa Callum Wilson, Ryan Fraser leh Matt Ritchie te Cherries lamah a lo enkawl tawh a, hei hi an lak chhan pakhat niin a lang.

Kum 43 mi coach hian Bournemouth a enkawl laiin League One-ah bul ṭan mah se Premier League hial a hruai thleng a, season nga top flight-a an cham hnuah an relegate avangin August 2020 khan a chhuahsan - hemi hnuah club enkawl a nei leh tawh lo.