Australia nge South Africa tling dawn?

T20 World Cup-ah Pakistan chiahin semifinal an la lut a, England pawhin semifinal an luh ngei hmel bawk. Hmun ruak pahnih dang hi tunkar tawp hian a chiang turah a ngaih theih a, cricket ngainatute tan chuan inkhel hmuhnawm thlir tur a awm ang.

Aussies nge Proteas?
Australia-in Ningani khan Bangladesh chu wicket riatin an sawp. Aussies hian over 15 lekah Tigers hi 73 runs chauh siamtirin an vawm hlum vek a, over 6.2 lekah 78 runs siamin target hi an umpha. Aaron Finch-a hote hi chiang taka an chak avangin an NRR a ṭhat phah a, semifinal lut turin an dinhmun a ṭha sawt.

Vawiin tlai dar 3:30 hian Australia-in West Indies an hmachhawn dawn a, hnehna an chang a nih chuan semifinal an lut turah a ngaih theih. Windies bakah group 1-a team dang pahnih Sri Lanka leh Bangladesh ten beisei tur an nei tawh lo.

Zanin dar 7:30-ah South Africa-in group hmahruaitu England a hmachhawn dawn a, Proteas tan semifinal lut tur chuan Three Lions hi an sawp a ṭul dawn. England hi chhiarkawp dan chuan la tla thei ni mah se a nihna takah chuan an NRR a ṭhat avangin tla thei lo angah a ngaih theih. South Africa erawh chak ringawt a tawk dawn lo a, Aussies leh Windies inkhel result-ah an hma lam hun a innghat tel.

India ve thung
Group 2-ah Pakistan an tling tawh a, Shaheens hnung zui turin New Zealand dinhmun a ṭha. Nizan khan India-in tla tawh Scotland an hmachhawn a, Black Caps-in Namibia an hmachhawn thung. Men in Blue leh New Zealand te hi chak tura ngaih an ni.

Chutihrualin India-in semifinal an lut dawn a nih chuan New Zealand an chak loh a ngai a, Black Caps hneh thei tura ngaih chu Namibia ni loin Afghanistan an ni. Pathianni tlai dar 3:30 hian New Zealand leh Afghanistan te an inkhel dawn a, he inkhel hian India hmalam hun a hril ang.

Thawhṭanni zan dar 7:30-ah India leh Namibia ten Super 12 match hnuhnung ber an khel dawn a, Black Caps hian Namibia leh Afghanistan te hi an hneh a nih chuan Men in Blue inkhel hian awmzia a nei lo ang.