Thawnthu thar ziaktu Saul 'Canelo' Alvarez

Mexican boxer ropui Saul 'Canelo' Alvarez a ropui belh zel a, undisputed world super-middleweight champion hmasa ber ni turin nimin khan Caleb Plant chu a hneh.

Kum 31 mi boxer hian round 11-naah Plant hi a knockout a, WBA (Super), WBC leh WBO title a kawl tawh sa belhchhah turin IBF title a hlawh belh leh ta.

Alvarez chuan, "Tun dinhmun thlen hi ka tan thil awlsam a ni lo a, ka team-te puihnain tun dinhmun hi ka thleng a ni," tiin a team chungah lawmthu a sawi.

Tuarchhel Plant
Las Vegas khawpuia inhnekah round 11 chhungin Alvarez a chung-nung tluan a, mahse, American boxer hian khawvela boxer ṭha ber pawl a hmachhawn chungin a peih rei viau.

Saul hian round 11-naah Plant hi vawi hnih ngawt a hnek thlu a, Mexican boxer Alvarez hian a boxer hmachhawn chu tlawm mai tura thurawn a pek hial thu a sawi chhuak!

Álvarez chuan, "Plant khan inhnek chhunzawm a la duh a, mahse, a tlawm zawk nih chu thil zahthlak a nih loh thu ka hrilh. A tawpah chuan ka dingchang ta a ni," a ti.

Zinkawng hautak
Alvarez hian vawi 60 fight-a hmachhawnah vawi 57 hnehna a chang a, vawi 39 a khingpui a knockout-na a ni - vawi khat a tlawm a, vawi hnih a khingpui a inhnehtawkpui.

Mexican boxer hian December 2020 khan Callum Smith hnehin WBA (Super) leh WBC title a hlawh chhuak a, February khan Avni Yildirim lakah a kawnghren hi humhimin May-ah WBO title a hlawh chhuak - IBF title a nei leh ta.

Alvarez chuan, "Ka title hi mi zawng zawng tan a ni a, a bik takin Mexico tan a ni e. Kan hlawhtling ta - khawvela undisputed fighter paruk zinga ka tel hi ka lawm a ni," a ti.

Plant fakna
Kum 29 mi Plant-a'n Alvarez anga boxer ropui a la hmachhawn ngai lo a, a career-a a vawi khat nan a tlawm ve ta - fight vawi 22 a hmachhawna a tlawm vawi khatna a ni.

Alvarez chuan, "Caleb kha fighter ṭha tak a ni a, boxer theihna nei sang tak a ni a, ka zah em em bawk. Theihtawp chhuahin a rawn khel a, a awlsam lo hle.

"Mahse, ka trainer Eddy Reynoso chuan round tawp lam pahnihah khan kan ruahman anga khel chhunzawm zel turin min ti a, a tawpah chuan kan hneh ta hram. Khatianga a tawp kha a ngai - a na tawh tih ka hria a, a tawp kharin ka hahdamtir ta a ni," a ti.

Sum a tam
Kum 1988-a WBO-in world title fight a sanction hnuah Alvarez hi boxing khawvela kawnghren liantham pali a ruala hreng thei parukna a ni a, sum pawh a hlawh hnem hle.

Alvarez hian a tlem berah dollar maktaduai 40 chu a hnek chhuakah ngaih a ni a, a hneh tak Plant-a'n dollar maktaduai 10 bawr vel a dawng ve bawk.

Khawvel huap boxer lar Canelo tan heti zat sum dawn hi thil thar a ni lo a, Plant erawh Canelo hmaa a inhnek hnuhnung berah $750,000 vel a hlawh nia sawi a ni a, chak zo lo mah se Canelo hmachhawn hi a tan chuan vanneihna a ni.

Canelo vs Alvarez
ROUND 1: Plant-a'n round tir aṭangin Canelo ngam a tum viau a, Mexican boxer a che hleithei bik lo - hmuhnawm lo takin round khatna a tawp.
ROUND 2: Canelo-a'n Plant attack a tum a, a duh angin a ti thei lo - Plant-a'n Mexican boxer a chhaih chhunzawm thung.
ROUND 3: Counter-attack ah Plant a innghat a, Canelo-a'n taksa lam a tum thung - Mexican boxer chungnunna round a ni.
ROUND 4: Canelo a zia tawlh tawlh a, Plant-a buai tulh tulh thung. Canelo-a'n Plant a hnek fuh a, American boxer a talbuai tih a lang.
ROUND 5: Canelo-a'n vawi hnih hnek fuh a nei a, Plant-a'n a chhanglet ve ve bawk. Plant a fimkhur tawlh tawlh a, round rei daih hram chu a tum ber a ni.
ROUND 6: Him tumin Plant a inveng a, Canelo-a'n hlau miah loa a attack thung avangin fans thawm a ring hle.
ROUND 7: Canelo a chungnun chhunzawm a, Plant tan corner ngheng chunga inven chu himna a ni chho a, chak tur rin a awl chho ṭan.
ROUND 8: Plant-a'n fimkhur takin a hnek chhuak ve reng a, Canelo ti na zo tur khawp hnek erawh a awm lo. Canelo-a'n hnek tluk ngei a tum thung niin a lang a, a theihna apiangah Plant-a hnek a ni ber e!
ROUND 9: Defensive game kheltu Plant-a'n round tawp lam an hnaih chho tawh tih hriain theihtawp a chhuah a, Canelo a talbuai.
ROUND 10: Plant-a'n rang zetin vawi li vel chu a kuttum a lek chhuak a, mahse, Canelo bawkin a nawr tawm a, vawi thum ṭha takin a hnek fuh.
ROUND 11: Plant-a'n hnehna chan a mamawh a, mahse, round 12 thlen tumin a bei hram hram a ni ber. Canelo-a'n a pumah a hnek hnuin uppercut hmangin Plant a hnek fuh a, tlu mah se a tho leh a, referee-in a inhnek nawntir. Mahse, Canelo bawkin Plant a hnek tlu leh a, American boxer tan din luih reng theih a ni lo.