Stamford Bridge-ah Chelsea an vanduai

Chelsea-in Burnley goal-ah pet goal ngei tumin vawi 25 zet shot an nei a, an pet goal zat erawh goal khat chauh a ni - Inrinni zan khan an mikhual Burnley nen 1-1 in an inhnehtawk.

Premier League hmahruaitu tan Kai Havertz chuan first half-ah goal hmahruai a khung a, nuam ti taka goal khung ṭhin Blues-in awlsam taka chak tura an inngaih laiin goal dang erawh an nei zui lo.

Burnley zawkin minute 79-naah Matej Vydra hmangin an si phurh sutna goal an khung a, goal dang a luh loh avangin relegation zone-a awm mek Burnley-in Stamford Bridge-ah point an hlawh chhuak.

Vanduai Chelsea
Premier League match li chhung a zawna an chak tawh avangin Blues hi awlsam taka chak tura ngaih an ni a, Havertz chuan minute 33-naah Reece James a cross aṭanga tauh goal-in mipui beiseina a nem nghet.

Mahse, goal hmaah Chelsea an vanduai zui - Andreas Christensen, Antonio Rudiger, Jorginho, Havertz leh Thiago Silva ten chance duhawm an hlah vek a, 2019-20 season hnua a vawi khat nana bul ṭan Ross Barkley pawhin a chance neih a chhawr bik lo - Burnley keeper Nick Pope a che ṭha takzet.

Hun tawp nan minute 11 chauh a awm tawh tihah Chelsea vanduaina belhchhah turin Vydra a inlar a, Czech striker hian Ashley Westwood-a cross aṭanga ball kal Jay Rodriguez-a siamsak chu a pet goal - hun tawp thleng goal dang a awm lo a, point an insem daih!

Chelsea thiam loh
Blues coach Thomas Tuchel chuan, "Khatiang game vang khan a ni he infiamna hi miin an ngainat em em - team dangin goal khung dan an theihnghilh miau chuan rin loh zawk pawhin point an hloh thei tlat.

"Khatiang game kha vawi 100 khel ila, vawi 99 chu kan chak ang. Vawiinah erawh kan chak tlat lo - goal hnihna khung ila, engkim a fel tur a ni.

"Mahse, vawi khat lek hlahin khatiang kha min thlen thei. Kan thiam loh a ni - khati zat chance kan insiam a, goal khung tur kan ni," tiin chhuanlam a siam lo.