Chanmari Zothan tan beiseina thar

Hero Futsal Club Championship-ah Chanmari Zothan chuan nimin khan Baroda Football Club 7-1 in an sawp a, group A inkhel dangah Mohammedan SC-in Super Strikers Futsal Club 4-3 in an hneh bawk.

Delhi-a inelna neihah hian group khat aṭangin pakhat chauh an tlang dawn. November 9, Thawhlehni hian Mohammedan leh Chanmaari Zothan an inkhel ang a, Super Srikers-in Baroda an hmachhawn dawn. A chunga awm pathum Mohammedan (6), Chanmari Zothan (3) leh Super Strikers (3) ten point ruk an hmu vek thei a, head to head en tur tih hriat tel a ṭha bawk.

Pathianni inkhelah Chanmari-in bul an ṭan ṭha a, minute khatna lekah K. Rohluahpuia hmangin goal an khung nghal. Semifinal lut turin goal difference neih ṭhat ṭul mah se Chanmari an chesual a, Sheel Parikh-a'n siphurh a sut lehnghal.

Amaherawhchu team ṭha zawk Mizo club tan Lalnunmawia'n goal li a khung bakah Samuel Laltlanthanga leh David Laltlansanga ten goal khat ve ve an khung a, 7-1 in an chak.

Chanmari Zothan hi an match hmasa berah Super Strikers laka an vanduai avangin semifinal luh beiseina nei turin Mohammedan-in hnehna an chan ngei a ṭul. Mizo club duhthusam a thleng a, Kolkata club-in hun tawp hma hretin chakna goal an khung a, 4-3 in Super Strikers an hneh.