India basketball team-ah Lalrina

Lalrina Renthlei chu SABA Men Championship 2021 hmachawn tur Indian Senior Basketball Team-ah thlan a ni a, Tuikhuahtlang tlangval hi H. Laldinsanga hnua India senior team-a tel leh hmasa ber a ni.

Infiamna lama talent nei ṭha bik Lalrina hi tualchhung basketball-ah chuan player langsar ber tiha chhal theih a ni a, Mizoram Super League hnuhnung paliah a club khelhna Zarkawt BCA leh Mission Veng Vikings a champion pui. Player ṭha bik a nihzia tichiang turin BCA vawi thum a champion pui ṭumin MVP-ah thlan a ni vek bawk.

Lalrina chuan, "India camp-ah hian tun hmain ka lo awm tawh a, senior team-a koh ka nih hi ka lawm takzet. Pathian khawngaihna zarah tun hun hi ka thleng a, Mizo ti hming ṭha turin theihtawp ka chhuah ang," tiin a sawi. Basketball inelna chi dang FIBA 3x3 world tour-ah pawh Lalrina hi India ram aiawhin ṭum hnih a feh chhuak tawh a, FIBA 3x3 ranking India-ah pawh hun rei tak number 1 a ni tawh a ni.

Zarkawt BCA guard Lalrina hi kum 2018 khan India camp-a awm turin koh a ni tawh a, kumin June-August thla chhung khan koh a ni leh bawk. Tun ṭum inelna atan hian camp hi September 20 khan neih ṭan a ni a, Lalrina hian October 1 khan training hi a ṭan a ni.

Lalrina chuan, "Foreign coach kan neih avangin beiseina sang tak a nei a, chutihrualin tling lo thei pawh ka ni tho. India team tana ka telh takah chuan theihtawp ka chhuah dawn a, chance neih ka neih ang te hman ṭangkai ka tum ang," tiin Vanglaini a hrilh.

SABA Men Championship 2021 hi November 15-20, 2021 chhung hian Dhaka Bangladesh-ah khelh a ni dawn a, India hi record nei ṭha ber niin vawi sarih neih tawhah vawi nga an champion.