Neymar-a'n goal 400 a khung ta

Paris St-Germain forward Neymar chuan Bordeaux lakah goal hnih khungin Paris club hi 3-2 in hnehna a chanpui. Brazilian star hian football a khelh hun chhungin goal 400 a khung tling ta - kum 29 mi chauh a la nih avangin a la khung belh zel dawn.

Brazil international Neymar hian PSG a pan hmain Santos leh Barcelona tan a lo khel tawh bawk, hliam leh pawn lamin thilin tibuai ve zeuh zeuh mah se, phur taka khelmual chhung a lut a nih chuan a hmuhnawm ber zinga mi a ni zel.

PSG an fal
Inrinni zan Ligue 1 inkhelah Neymar-a goal khung pahnih hi Kylian Mbappe siamsak ve ve a ni a, France international hian second half-ah an goal thumna a khung ve bawk a, midfielder Georginio Wijnaldum siamsak a ni ve thung.

Mualneitu Bordeaux lamin goal thum an neih hnuah thapui an thawh a, hun tawp dawn lamah Alberth Elis leh M'Baye Niang te goal hmangin beiseina an insiam thar leh. Mahse, si phurh sut zo turin hunin a daih tawh lo.

Mauricio Pochettino-a naute hian Ligue 1-ah fal takin hma an hruai mek. Match 13 aṭanga point 34 hmuin table chung berah an awm a, anmahni hnaih bertu Lens aiin point sawmin an sang zawk - champion lai Lille chuan point 16 chauh an la nei ve thung.

Poch a lungawi
Tihrawl hliam vangin Lionel Messi a inlan thei lo a, an player ṭha tel lo mah se PSG-in point thum an hmu thei. Coach Pochettino chuan a naute khelh dana a lungawi thu a sawi a, tlarhnung erawh siamṭhat an la mamawh thu a sawi bawk.

Poch chuan, "Inkhel thunun tak chungin point thum kan hmu thei a, a lawmawm hle. Goal thum chauh kan khung kha a mak zawk, chutih rualin hun tawp dawn lam minute 10 vel kha kan talbuai tih a lang," tiin a sawi.

International break a awm zui dawn a, an ram Argentina tan Messi hi a inlan thei ngei dawn em tih pawh a la chiang lo. Tun dinhmunah chuan Messi hian PSG aiin Argentina a ngai pawimawh zawk - Uruguay leh Brazil an hmachhawn turah chuan a inlan a rinawm.