India an ropui tlai hret?

T20 World Cup-ah India-in an theihna tak an lantir a, Zirtawpni zan khan ball 81 dah bangin Scotland chu wicket riat zetin an sawp. Virat Kohli hote hian Scotland an sawp hmain Afghanistan hneh bawk mah se inelna ṭantirha Pakistan leh New Zealand te an hneh loh avangin an hmalam hun an kutah a awm lo.

Nimin khan New Zealand leh Afghanistan te an inkhel a, Black Caps hian hnehna an chang a nih chuan he thu i chhiar meuh chuan India beiseina a tawp tawh ang.

Chutihrualin Afghanistan-in hnehna an chang ve thung a nih erawh chuan Kohli hote tan zanin dar 7:30-a Namibia an hneh a nih chuan semifinal an lut dawn.

India tan Shami
India-in Pakistan an hneh loh ṭumin Mohammed Shami-a'n sawisel a hlawh a, Scotland lakah erawh Indian bowler hi a che ṭha takzet. Kum 31 mi Shami hian opener George Munsey (24) a vawm hlum a, over 17-naah Calum MacLeod (16) leh Alasdair Evans (0) te a vawm hlum leh bawk.

Scotland-in Indian bowler-te an ngam lo a, over 17.4 lekah 85 runs siamin an thi vek. Shami bakah Ravindra Jadeja-a'n wicket thum (15/3) a la a, Jasprit Bumrah-a'n wicket hnih (10/2) a la bawk.

Hei le, Rahul
India-in semifinal beiseina chhi nung turin NRR neih ṭhat an mamawh tih an hria a, opener KL Rahul chuan ball 19 lekah 50 runs a siam. T20 World Cup-a half century siam rang pathumna a ni a, 50 runs siam rang ber chu Yuvraj Singh niin ball 12 lek a mamawh.

Men in Blue hi over 6-ah hnehna chang thei an ni a, KL Rahul-a'n four vuak tum mah se Callum MacLeod-a'n a mansak. Amaherawhchu 6.3 overs-ah India-in hnehna an chang tho a, Rahul (50) bakah Rohit Sharma (30) leh Surakumar Yadav (6*) te an che ṭha.