Australia an tling, South Africa an vanduai

T20 Cricket World Cup-ah Australia-in semifinal lut turin champion lai West Indies chu wicket riatin an sawp a, Inrinni inkhel dangah South Africa-in 10 runs-in England hneh mah se NRR (net run rate) hmangin an tla. Group 1 aṭangin England, Australia leh South Africa ten point riat an hmu vek a, Three Lions leh Aussies ten semifinal an lut.

Aussies nge nge
Sheikh Zayed Stadium-ah Australia-in vawm hmasak an thlang a, Aussies hian an khingpui West Indies an hneh a nih chuan NRR hmanga semifinal lut tura ngaih an ni.

Aussies tan Josh Hazlewood-a'n 39 runs chauh pein wicket li ngawt a la a, West Indies-in Kieron Pollard (44), Evin Lewis (29) leh Shimron Hetmyer (27) te hmangin 157/7 runs an siam.

Australia tan opener David Warner-a'n thi loin ball 56 lekah 89 runs a siam a, Mitchell Marsh-a'n (53) a rawn thlawp ṭhat bawk avangin over 16.2 lekah 161/2 runs siamin hnehna an chang.

Proteas an vanduai
Australia an chak chian avangin South Africa-in semifinal lut turin match lia chak vek England an sawp a ṭul a, hmabak a ko hle. Ṭhumvawra vannei zawk England-in vawm hmasak an thlang a, NRR ṭha mamawh Proteas tan hna a harsat phah sawt bawk.

South Africa top order an che ṭha a, Quiton de Kock-a'n 34 runs a siam bakah Rassie van der dussen-a'n thi loin 94 runs a siam a, Aiden Markram-a'n ball 25 lekah 52 runs a siam. Proteas-in over 20-ah 189/2 an siam.

England tan target harsa a ni a, chutihrualin an NRR a ṭhat avangin semifinal luh erawh a harsa lo. Chutihrualin Three Lions kutah Aussies an innghat a, England hian 131 runs an siam phak lo a nih chuan South Africa an tling ang a, Australia an tla dawn.

Three Lions opener Jason Roy chu 20 runs chauh a siam tihin inhliam vangin a chawlh a ṭul a, amaherawhchu England-in Moeen Ali (37), Dawid Malan (33), Liam Livingstone (28) leh Jos Buttler (26) te hmangin 179/8 runs an siam. South Africa hoin hnehna chang mah se NRR hmangin an tla a, Eoin Morgan-a hote zarah Australia an tling.