Xavi tih phur zawh loh Barcelona

Barcelona legend Xavi chu a club tluchhe mek dinthar leh turin Nou Camp-ah a kir a, mahse, Barca player-ten coach atan Xavi an nei dawn tih inhre chungin hnehna an chang zo chuang lo.

Xavi-a'n kum 2024 thleng Barca enkawl turin contract ziak mah se vawiinah official taka tlangzarh a la ni dawn chauh a, Catalan club-in coach lailawk Sergi Barjuan hoin Celta Vigo an lenchilh.

Barcelona-in first half chhungin Ansu Fati, Sergio Busquets leh Memphis Depay hmangin goal thum an khung a, mahse, second half-ah an khingpui hi an sut zawh tir vek!

Ka lo haw
Qatari club Al Sadd-in an coach Xavi-a'n Barcelona a pan tur thu an puan hnuah Catalan club-in an player hlui chu an coach a nih tur thu an puang ve bawk a, Barca fans an phur takzet.

Spanish midfielder ropui ṭhin Xavi pawh a phur a, player a nih laia Barca tana nomawi chawi theih zawng zawng chawitu hian, "Ka fans leh lungrualpui in ni a, he club hi khawvela ka hmangaih ber a ni.

"Tunah chuan ka lo haw ta, Culers (Barca ṭantu sawina) kan inhmu thuai dawn nia, Barca, kal zel ang aw," tiin Barca a kir tur thu a puang a, result lo hmuaktu erawh a ropui lo.

Barca an tho...leh lo!
Celta khelmualah inkhel ṭantirh aṭangin Barcelona an hlauhawm nghal a, goal khung tur pawhin an nghah rei a ngai lo - Ansu Fati chuan minute ngana lekah goal hmahruai a khung nghal.

Barca an phur laklawh - Busquets-a'n minute 18-naah tawih zetin a pet goal ve leh a, Depay-a'n minute 34-naah a khung ve leh bawk avangin chak tur a chiang tawhah a ngaih theih.

Mahse, Catalan club an phur sual. Chawlhlawk hman a nih hnuah Celta Vigo an insiam ṭha a, club legend Iago Aspas chuan a kum tam tawh mah se goal khung a la thiam reng tih pholangin minute 52-naah si phurh a sut ṭhen.

A hming Aspas
Manchester City striker hlui Nolito-a'n minute 74-naah a khung ve leh a, goal khat chauha hmahruai tawh Barca tlarhnungin inrintawkna an hloh tih chiang takin a lang.

Barca talbuai zarah Aspas chuan hun pek belhah si phurh sutna goal a khung leh a, kum 34 mi striker hian tun season-a a goal ngana hmangin Barca a vel a, Celta tan point khat hlu tak a hlawh chhuak.

Catalan club an chak zawh loh leh tak avangin table-ah pakuana an nih chhunzawm zel a, league match 12-ah point 17 chiah an la nei - Barca player Eric Garcia leh Fati chu Celta lakah hliam vanga lakchhuah an ni bawk a, Xavi tan a hmuhnawm loh khawp ang.

Hmahruaitu Real
Barcelona-in chanchin lawmawm an neih theih loh laiin Real Madrid erawh an kal zel a, an mikhual Rayo Vallecano chu 2-1 a hnehin La Liga hmahruaitu an ni - nizana inkhel Real Sociedad result a zirin table a danglam leh thei thung.

Real tan Toni Kroos-a'n minute 14-na lekah mawi takin goal hmahruai a khung a, Karim Benzema chuan tun season-a a goal 14-na hmangin a chhunzawm ve leh bawk.

Vallecano tan bench aṭanga luhtir Radamel Falcao chuan a season hman ṭhat chhunzawmin goal khat a chhanglet a, mahse, league match riat aṭanga a goal ngana hmangin a team a kai harh zo chuang lo.