Juventus an chak hram

Hun tawp dawna Juan Cuadrado goal khat khung hmangin Juventus chuan an mikhual Fiorentina chu 1-0 in an hneh hram a, point thum hlawh chhuak mah se tun hnaia an khelh danah fans tan lungawi a harsa.

Inrinni zan khan Allianz Stadium-ah Old Lady hian mikhual an thleng a, beisei angin inkhel an thunun thei lo. Italy international Federico Chiesa-a'n bar a tih per dawp bak chu hlauhawm taka chet an harsat.

Mikhual defender Nikola Milenkovic chu minute 73-naah hnawh-chhuah niin, player tam zawk an nih hnuah pawh Juve hmatawngte an che hleithei lo a, a tawp dawnah Cuadrado chuan vanneih goal a khung ta hram.

Juventus manager Massimiliano Allegri chuan, "Ka naute khelh dan leh an rilru put hmangah ka lawm, hun tawp hma chuan kan beidawng ve ngai lo a ni tih chu a takin an lantir a, a tawpah chak phu zawk kan neih ang ngeiin point thum kan hmu.

"Tuna hnehna kan chan hian inrintawkna min pe ngei ang, kan vanneih ṭum chu ni se goal khat aia tam kha kan khung theih ka ring," a ti a, season chawhma lam a la nih avangin engpawh thleng thei a la nih thu a sawi tel bawk.

Juve hian Serie A match 12 khelh aṭangin point 18 an hmu a, table-ah pariatna an ni. Match khata khel tam zawk chungin hmahruaitu Napoli leh AC Milan an phak lohna chu point 13 zet a ni tawh a. nomawi chawi a harsa tawh ang.

Italy - Serie A
Spezia 1 - 0 Torino
SPE: Jacopo Sala 58'
Juventus 1 - 0 Fiorentina
JUV: Juan Cuadrado 90+1'
Cagliari 1 - 2 Atalanta
CAG: Joao Pedro 27'
ATA: Mario Pasalic 6'; Duvan Zapata 43'