Norwich chak mah se coach an ban!

Premier League kai thar inkhelah Norwich City chuan 2-1 in Brentford hneh mah se coach Daniel Farke-a'n a hna a humhim zo chuang lo a, ban a ni.

Brentford khelmualah Norwich-in Mathias Normann leh Teemu Pukki (penalty) goal hmangin awlsam takin hma an hruai a, mualneitu tan Rico Henry chuan si phurh sut ve mah se a team a chhanhim zo lo.

Premier League mawngphah luahtu Norwich tan tun season-a an vawi khat chakna a ni a, coach Daniel Farke-a'n English top flight league-a cham chhunzawm zel tura theihna an neih thu sawi zui mah se a hnu lawkah ban a ni!

Kum 45 mi coach hian inkhelh zawhah, "Premier League-a inhamtang turin chance kan nei. Tlankawng thui tak a ni a, kan thawhho ṭhat phawt chuan team-in kan hlawkpui zel ang. Premier League-ah kan cham ang, tiin ka sawi thei lo a, mahse, min lo ngaihthah hlauh ang e," tiin a sawi.

Farke hian hetihlai hian ban a ni dawn tih a la hre lo niin a lang a, July 2025 thleng cham turin contract nei mah se Canaries thuneitu lam dawhtheihnain a tlin tak loh avangin ban a ni.

Norwich sporting director Stuart Webber chuan, "Premier League-a cham chhunzawm zel turin tun hi inthlak danglam hun niin kan hria a ni," tiin an coach an ban chhan a sawi.

Farke hian May 2017 khan Norwich enkawl hna hi a thawk ṭan a, a season hnihnaah Championship nomawi chawipuiin Premier League an inhlangkai.

Mahse, English top flight league-ah season khat chiah an cham tihin Championship lamah an tla leh a, season hman zawh takah khan champion pui lehin Premier League an inhlangkai.

German coach hi EFL Championship Manager of the Season atan thlan a ni hial a, mahse, Premier League-ah a che chhe nawn - September thla khan a zawna vawi 15 nan Premier League-ah Norwich a tlawmpui a, English top-flight chanchina club emaw coach emaw an chak loh zawn rei ber record a ni.

Hei chauh a ni lo - Borussia Dortmund II boss hlui hian English top flight game 49-ah vawi ruk chiah hnehna a chang a, Premier League manager, match 20 aia tam team kaihruai zinga chak record nei chhe palina a ni - Championship-ah a ropui a, Premier League-ah a che chhe leh ṭhin a ni ber!