Simona tan nomawi hlu bik

"Tennis ka khelh tirh aṭang khan tun hun lo thleng tur hi thlirin duhthu ka sam ṭhin," tiin Simona Halep chuan a vawi khat nana French Open nomawi a chawi hnuah a sawi. World number 1 Halep hian junior girls champion a nih tawhna hmunah kum 10 a liam hnuin women's singles champion a ni leh ta.

Inrinni zan Court Philippe-Chatrier-a inkhelah Halep hian a khingpui Sloane Stephens chu darkar hnih leh minute thum chhungin 3-6, 6-4, 6-1 in a hneh a, tennis inelna lian leh ngaihhlut Grand Slam title hmasa ber a la.

Inkhel chu
Clay court inelna liana hmeichhe huang hmawr bawk zanah US Open champion lai Stephens-i'n bul a ṭan fuh zawk a, break point vawi khat a hmuh hmang ṭangkaiin set a la. Set hnihnaah pawh American nula bawkin Halep service a chhuhsak leh, seeded 10-na zawk hian a vawi hnih nan major title a la mai dawn niin a lang hman.

Mahse, set hnihna tawp lam aṭangin Halep a inlar. Romanian star hian set hnihna hnuhnung lam leh set thumna tir lam chhiar zawmin game sarih ngawt a la zawn a, winners vawi 18 vaw chhuakin a khingpui service vawi nga a chhuhsak bawk. Inelna lian dang a hmachhawn tawh ṭhin ang lo takin hnehsawh takin hnehna a chang.

Season hmasa khan a hmun ngaiah hian Halep-i'n final a khel a, Latvian nula Jelena Ostapenko lakah set hmasa ber lain set hnihnaah a service a chhuhsak bawk. Dinhmun ṭha taka a din hnuin a beiseina a thamral a, kuminah erawh nikuma thil thleng letling ang chiahin thil a thleng thung–dinhmun chhe zawka a din hmasak hnuin huaisen takin a tho chhuak.

A phu e
Kum 26 mi Halep hi tunlaia hmeichhe tennis player ṭha leh langsar ber tih ngam a ni a, Grand Slam vawi 23 champion tawh Serena Williams a awm loh phei chuan ranking thununtu ber a ni. Mahse, a vannei tawk lo; inelna lianah hian final a khelh hmasa pathumah a chak lo vek a, a vawi linaah a hlawhtling chiah.

French Open-ah final vawi thum a khel tawh a, season tir lam khan Australian Open-ah pahnihna a ni bawk. WTA titles 17 zet chawi tawhtu hi miṭhenkhatin 'Grand Slam final boruak zo lo' tiin sawisel ṭhin mah se, tunah chuan thiltih hmangin a mah ringhleltute a ngawih tir ta a ni.

Halep chuan, "Hun lungngaihthlak ka tawng fo tawh a, khang hun lai khan engtikah emaw chuan ka tan kâwl a la êng ve ngei ang tiin ka infuih ṭhin. Inrintawkna ka nei a, ka champion theih nan hian ka tih theih awm zawng zawng chu ka ti kim vek a ni.

"Grand Slam zingah chuan Roland Garros hi ka ngainat ber a ni a, he hmuna match khat chauh chak pawh hi nuam ka ti ṭhin. Season tharah pawh beiseina nen ka inlan leh ang," a ti. Halep hian July thlatir aṭanga khelh ṭan tur Wimbledon atan inbuatsaihna a neih zui tur thu a sawi tel bawk.