MFA-in futsal hmathlir a puang Club thar inziah luh hun an hawng

Mizoram Football Association hnuaia Futsal Committee chuan kum 2018-2019 season chhunga hmalakna tur hrang hrang a rel. MFA Futsal League khel tur club 16-te bakah Division One lama inziak lut duh club-te tán inelna hrang hrang a buatsaih dawn a; Division One-a tel thar duh club a duh apiang tan inziah luh theih a ni.

MFA League
MFA Futsal League-ah hian season hmasaa club 14-te bakah Division One aṭanga kaisang tur IDBI Capital, Tuikual North leh Zonuam Futsal Club-te an awm dawn. MFA Futsal League hi January-March, 2019-ah khelh a ni ang a, he mi hma hian tournament chi hrang hrang an khelh tur buatsaih a ni ang. MFA Futsal Committee chuan inelna a tamt hei ang ber buatsaih an tum.

Division One
MFA Futsal hnuaia division hniam zawk Division One-ah hian a duh apiang tan inziah luh theih a ni a, June 13-29 chhungin MFA Office, City Park-ah inziah luh theih a ni. Season hmasaa Division One-a khelte pawh a thara inziah luh leh vek tur a ni.

Club affiliation atan Rs 500 pek tur a ni a, player pakhat zelah registration fee Rs 50 pek a ngai bawk ang. Player hi 14 aia tlem lo, 20 aia tam lo ziah luh tur a ni ang.

Hmeichhia leh a dangte
MFA Futsal Committee calendar duanah a vawi khatna atan hmeichhe inelna neih tur a ni a, October-a khelh tura ruahman a ni. Hmeichhe inelna hi chu 'open' tournament a ni ang.

Kum 40 chung lam inkhelhna tur veteran tournament pawh a buatsaih leh dawn a; hei bakah hian college inelna leh kum bithliah (age group) inelna buatsaih a ni bawk ang.

Player-te hriattirna
MFA Futsal Committee chuan MFA hnuaia inziak lut leh season thara inziak lut tur player-te chu MFA buatsaih ni lo intihsiakna danga tel lo turin a hriattir a, chutianga tel player hriat an nih chuan MFA lama an registration cancel theih a ni ang. MFA pawmpui loh inelnaa tel player-te chu MFA hnuaiah an inkhelh phalsak a ni lo ang.