Astana-ah Biakkima a vanduai

Kazakhstan khawpui Astana-ah Mizo tlangval NT Lalbiakkima'n Inrinni tlai khan khawtual boxer Ezahn a hneh lo. President's Cup semifinal-ah Siaha tlangval hi a tir aṭangin a nawrtu zawkah a ṭang a, inhnek zawhah pawh chak zawk turah inngai mah se a beisei angin judge-te'n thutlukna an siam lo.

Navy boxer Biakkima chuan, "Judge-ah Kazakh mi pathum an ṭhuttir a, round tinah ka chak lo vek. Mipui, a hmuna kan inhnek entu Kazakh hovin i chak zawk mi ti vek bawk si a, mak tak a ni.

"Dusmatov nena kan inhnek ṭum aiin ka hnek chiang tam zawk a, kan coach-te pawhin round tin a zawh rualin 'ka la' an ti zel a, kan la vek e, an ti. Entu zawng zawngin 'you win' min ti vek a, hriatthiam a har khawp mai," tiin a lungawi loh thu Mizo boxing coach R. Lalchhuanawma (Sete-a) a hrilh.

Inhnek zawh rualin Setea chuan, "An inhnek dan thlir khan kan beisei sang khawp mai. A chak turah ka ngai a sin," tiin judge thutlukna hriatthiam a har thu Vanglaini a hrilh.

Light fly weight category (49 kg)-ah Biakkima hian Thailand boxer ṭha Narinram Thani a hneh hnuin Olympic gold-medallist Hasanboy Dusmatov a hneh thei a, duhthusamin inelna khar lo mah se Dusmatov meuh a hneh avangin India boxing-ah a buk a rit sawt ang.