Golden State-in Cavaliers an sawp

Golden State Warriors chuan season li chhunga NBA title pathumna ni turin Cleveland Cavaliers lakah 4-0 in series an la. Finals game hmasa berah overtime hial khelh ngai mah se game hnuhnung pathumah erawh chiang takin GSW an chak vek a, Inrinni zing game 4-ah 108-85 in hnehna an chang.

Cavaliers star LeBron James-a'n kum riat chhung a zawnin NBA final a thleng thei a, amaherawhchu team anga ṭha rual ber Warriors ropuina a dal zo lo.

Game 4 chu
Inrinni zing inkhelah James-a'n pui takin quarter hnihnaah dunk-in 39-38 in hma hruai chiah mah se Quicken Loans Arena-a mipui lawm hunchhung a rei lo. Halftime-ah Golden State lamin 61-52 in hma an hruai leh tawh.

Court chhungah Stephen Curry a langsar ber a, point 37 zet a lut a. Kawng engkimah Golden State chungnungin 108-85 in hnehna an chang.

Cavs coach Tyronn Lue chuan, "Player panga khalh thei, pass thei leh shoot thei an nei a. Eng ang pawhin veng ṭha ila Steph leh KD ten mak tak takin an lut thei tlat," tiin an khingpui a fak.

GSW coach Steve Kerr chuan, "Kum thum liam taa helai room-a ka ṭhut ṭum ka hre chhuak a, kan mumang ram hi a theih a ni tih ka hre thei a ni. Ka chapo vang lam a ni lo a, ka player theihna sang vang leh tawnhriat kan neih belh zel avangin tun dinhmun hi ka lo beisei lawk a ni," tiin a inrintawk hle.

MVP–Durant
Warriors leh Cavaliers te hi finals-ah vawi li a zawna an inhmachhawnna a ni a, an intum hmasa pahnihah vawi khat ve ve an chak a, an intum tawk.

Golden State-in NBA thunun duhin star rual belh turin mi bik Kevin Durant an lakluh belh a, Cavs tan cho rual an ni tawh lo. Kum 29 mi Durant hi kum zawnin Most Valuable player-ah thlan a ni.

Game 4-ah pawh hian Durant hian triple double a nei pha a, 20 points neiin rebound 12 a lak bakah assists vawi 12 a nei bawk. Final game li bikah hian Durant hian chawhrualin 28.7 pts, 10.7 rebounds leh 7.5 assists a nei a; MVP thlanaah Curry aiin 7-4 in vote a hmu sang zawk.

Durant chuan, "A pawimawh ber a ni em? A pawimawh zawk chu ṭum hnih a zawna kan champion hi a ni. Mimal lawmman hi chu an a chuang liam chauh a ni a, finals-a kan chak hi a pawimawh ber," tiin a sawi.

GSW-in final vawi li an khelh tawhah Curry hi MVP a la ni lo a, Durant bakah hian LeBron James (2016) leh Andre Iguodala (2015) ten MVP chawimawina hi an dawng tawh a ni.

LeBron hmalam
Basketball history-a player ropui ber zinga mi LeBron James chu season tawp rualin a contract a zo dawn a, free agent a ni dawn. Kum 33 mi ni tawh mah se a la ṭhat em avangin a hmalam hun tur hi an inrinsiak nasa.

LeBron chuan, "Tunah rih chuan ka hmalam hun ka hre lo a, ka chhungte nen kan sawi ho ang," tiin a inti itawm thiam hle. James hi Golden State lakah 4-0 ngawtin chak lo mah se basketball ngainatu ṭhahnem takin champion team ai hian a chanchin an la ngaihven zawk tho ang.

James hi final game paliah inlan vek mah se game 1 khelh zawhah whiteboard a hnek avangin a kutah hliam a tuar a, game hnuhnung pathum hi inhliam chungin a khel a ni.